Procesi i zgjedhjeve të brendshme në Partinë Demokratike është një rezultat i paracaktuar që i shërben ekskluzivisht agjendës personale të Sali Berishës. Ky është përfundimi i nxjerrë nga analisti Zylyftar Bregu, i ftuar në emisionin “3D” të drejtuar nga Alban Dudushi në ekranin e RTSH.
Gjatë analizës së tij, Bregu e zhvendosi theksin nga emri i fituesit – i cili sipas tij dihet tashmë – te pasojat dhe arsyet e vërteta që fshihen pas këtij procesi elektoral brenda selisë blu.
Analisti kritikoi rregullat e vendosura nga lidershipi i PD-së për të drejtën e votës dhe kandidimit, duke theksuar se ndarja e demokratëve në ata që “kanë punuar kundër” dhe ata që “kanë kontribuar”, e bën garën të njëanshme.
“Nuk përbën lajm se kush do të zgjidhet kryetar, sepse kjo dihet,” theksoi Bregu. Sipas tij, pyetja e vërtetë që duhet të ngrihet nuk është nëse fiton Berisha, por se çfarë do t’i sjellë Partisë Demokratike në të ardhmen mbajtja e tij në këtë post.
Legjitimimi i procesit dhe paralelizmi me zgjedhjet kombëtare
Për të ilustruar atë që e quan si “artificë” të Berishës për të legjitimuar këtë proces të brendshëm, Bregu bëri një paralelizëm me qëndrimin e PD-së ndaj zgjedhjeve parlamentare.
Ai vuri në dukje se, pavarësisht pikave të errëta të evidentuara në raportin e OSBE-ODIHR për zgjedhjet e fundit politike, vetë Partia Demokratike dhe Sali Berisha e kanë njohur procesin de facto, duke qenë pjesë aktive e Kuvendit të Shqipërisë.
Beteja me statusin ‘non grata’
Pika kyçe e analizës së Bregut ishte lidhja e këtyre zgjedhjeve partiake me sanksionet ndërkombëtare që rëndojnë mbi kreun e PD-së.
“Ajo që po shohim tani është një farsë në funksion të zgjedhjes së Berishës,” argumentoi analisti. Ai nënvizoi se mbajtja e vulës dhe e postit zyrtar si Kryetar i Partisë Demokratike është jetike për Berishën, pasi vetëm në këtë cilësi ai mund të përdorë sërish kompani lobimi në përpjekjet e tij për të hequr statusin ‘non grata’ të vendosur nga Shtetet e Bashkuara të Amerikës dhe Britania e Madhe.
