Trajneri i Bolognas, Vincenzo Italiano, ndau pritshmëritë e tij përpara përballjes në çerekfinalet e Europa League kundër Aston Villës.
“Po e përjetojmë këtë moment me entuziazëm të madh. Fitorja në Cremona na ka dhënë shtysën e duhur për t’u përgatitur sa më mirë. Po hyjmë në një periudhë të vështirë me moral të lartë dhe tani mbetet të shohim nëse mund ta ruajmë këtë formë edhe në një ndeshje kaq të fortë si ajo e nesërmja.
Jam i vetëdijshëm për pasionin e jashtëzakonshëm të tifozëve tanë. Mbështetja e tyre do të jetë e madhe dhe kjo është diçka për të cilën duhet të ndihemi krenarë. Shpresoj që ata të jenë gjithmonë pranë nesh, sepse atmosfera në stadium duhet të jetë e veçantë. Së bashku me ta dhe me dëshirën për të fituar, do të bëjmë maksimumin për t’i vënë në vështirësi një kundërshtari që në letër duket më i fortë. Me përkrahjen e të gjithëve, diferencat mund të zvogëlohen.
Dy përballjet e mëparshme ishin në fazat e grupeve—një në këtë edicion të Europa League, ku Aston Villa fitoi 1-0, dhe një tjetër në Champions League 2024/25, ku ata triumfuan 2-0. Tani situata është ndryshe, pasi kemi të bëjmë me një duel 180-minutësh. Ne i njohim pikat e tyre të forta dhe të dobëta; ata janë një skuadër me cilësi dhe individualitete të spikatura. Për t’i përballuar, do të na duhet një paraqitje e nivelit shumë të lartë.
Besoj se do të krijojmë raste për gol dhe duhet të tregojmë saktësi në shfrytëzimin e tyre,” theksoi Italiano. “Fitorja në Kupën e Italisë na ka sjellë deri këtu. Tani kam mundësinë të përballem me një trajner të madh si Emery, i cili di ta bëjë ekipin e tij shumë konkurrues, dhe kjo më bën krenar.”
