Nga Agron Shabani
Politolog dhe publicist
Gjermani, më 24.04.2026
Ka ndërruar jetë në moshën 88-vjeçare akademiku dhe shkrimtari Rexhep Qosja. Ai la pas një trashëgimi letrare e shkencore të paluhatshme, duke u shndërruar në një pasqyrë dhe vend-reflektimi për historinë dhe fatin bashkëkohor të shqiptarëve.
Me perëndimin e figurës poliedrike të Rexhep Qosjes, kombi Shqiptar ndahet nga një prej kolosëve më të vlefshëm të mendimit dhe nga një mbrojtës i panënshtruar i identitetit tonë. Vështrimi i tij i mprehtë mbi shoqërinë dhe guximi për të artikuluar të vërtetat e mëdha, e dalluan gjatë gjithë jetëshkrimit të tij; ai mbetet nismëtar i debateve thelbësore, të cilat formësuan vetëdijen tonë shoqërore dhe politike.
Qoftë si romancier, historian i letërsisë apo eseist – Rexhep Qosja gatiti një korpus veprash, të cilat do t’i rezistojnë kohërave. Si një vëzhgues i thellë dhe polemist i pashmangshëm, ai la gjurmë të pashlyeshme në historinë e Kosovës dhe të mbarë hapësirës shqiptare. Vepra e tij është një studim empatik mbi shpirtin njerëzor dhe, njëkohësisht, një kapitull i artë në historinë e mendimit shqip. Lidhja e tij e pathyeshme me rrënjët dhe përkushtimi i lartë ndaj çështjes kombëtare e shoqëruan atë në çdo rresht që shkroi.
Do të na mungojnë shpirti i tij vigjilent, mendja e tij kritike dhe puna e tij titanike. Ngushëllime të sinqerta familjes, bashkëpunëtorëve dhe gjithë adhuruesve të veprës së tij monumentale.
