Rubrika e poezisë “Melodia e Vargut” këtë herë prezantohet me vargjet e Martin Camajt. Publiku ka mundësinë të shijojë 3 poezi të shkrimtarit.
MELODIA E VARGUT
Sonila Strakosh
Rubrika e poezisë këtë herë prezantohet me vargjet e Martin Camajt.
Poezia e parë e bukur deri në dhembje
1. Shiu mbi lum’
Mjegulla nga bjeshka ulet kadalë
e pikat e shiut po bijnë mbi lum
në qiellin e vrantë lëviz nji halë
shpirti s’don dhimba e trupi lyp gjum.
Ujë â bâ gjethi e teshat e blegës
e pikat e shiut po bijnë mbi lum
dëshira e pjekun po bjen prej degës
shpirti s’don dhimba e shtati lyp gjum.
Në votër flaka po del krandeve
e pikat e shiut po bijnë mbi lum
veshët e mij janë lodhë prej zâneve
Shpirti s’don dhimba e trupi lyp gjum.
2. Të parën lule
Të parën lule që ndesha
Un ty ta pruna.
A thue din lulja çka ndiejmë për të?
Heshtojmë! Ajo krye-ulun andrron
Livadhet që là.
3. Kam shikimin tand në shpirt
Vargje të mrekullueshme këto, ku ndjenja shkrihet kaq natyrshëm me natyrën, trupin, shpirtin.
Kam shikimin tand në shpirt
dhe melodinë e pavdekshme
të gjakut në pasion.
Freskia mëngjesore
dhe bari i lagun fryjnë
zemrën time të zgjueme
nga prania jote në të.
Kam shikimin tand në shpirt.
Filli i zanit tand
depërton gjymtyrët e mija
dhe trajtat tua rrijnë
të pashlyeme
në bebzat e syve të mij,
që lahen për të parën herë
në jetë
në këtë mëngjes me diell.
