Federata e Futbollit e Senegalit (FSF) ka vendosur të shkarkojë trajnerin Pape Thiaw dhe të gjithë stafin e tij teknik pas paraqitjes zhgënjyese të kombëtares në Kupën e Botës 2026.
Vendimi u mor gjatë një mbledhjeje të Komitetit Ekzekutiv të FSF-së në Dakar, duke i dhënë fund periudhës së Thiaw në drejtimin e “Luanëve të Terangës”, më pak se dy vite pasi ai mori zyrtarisht drejtimin e skuadrës.
Senegali arriti deri në fazën e 1/16 së finales së Botërorit, pasi u kualifikua si një nga ekipet më të mira të vendeve të treta. Megjithatë, rrugëtimi i afrikanëve u shoqërua me rezultate të luhatshme në fazën e grupeve, ku pësuan humbje ndaj Francës dhe Norvegjisë, ndërsa siguruan një fitore të thellë 5-0 ndaj Irakut.
Eliminimi erdhi në mënyrë dramatike ndaj Belgjikës. Senegali po kryesonte 2-0 falë golave të Habib Diarra dhe Ismaila Sarr, por belgët përmbysën gjithçka me realizimet e Romelu Lukakut dhe Youri Tielemans, i cili shënoi edhe penalltinë vendimtare në kohën shtesë për fitoren 3-2.
Pas eliminimit, kritikat ndaj Pape Thiaw u shtuan, veçanërisht për zgjedhjet taktike dhe menaxhimin e ndeshjeve, pasi skuadra nuk arriti të ruante avantazhet e krijuara.
Në deklaratën zyrtare, FSF bëri të ditur se vendimi erdhi pas një analize të performancës së kombëtares dhe se ndryshimi në pankinë shihet si i nevojshëm për të ardhmen e futbollit senegalez.
Presidenti i federatës, Abdoulaye Fall, është ngarkuar të komunikojë vendimin me Thiaw dhe të drejtojë procesin e riorganizimit të ekipeve kombëtare.
Ndërkohë, kanë nisur edhe spekulimet për pasuesin e tij. Mes emrave që përmenden për të marrë drejtimin e Senegalit janë Habib Beye, Patrick Vieira dhe Hervé Renard.
Federata senegaleze tashmë kërkon një trajner të ri që do të udhëheqë skuadrën në ciklin e ardhshëm ndërkombëtar.
