Presidenti ukrainas Volodymyr Zelensky mund të ftohet të marrë pjesë në samitin e G20-ës në dhjetor, në Miami, nëse presidenti amerikan Donald Trump mendon se nga pjesëmarrja e tij mund të rezultojë “diçka pozitive”.
Kështu ka bërë me dije Sekretari Amerikan i Shtetit, Marco Rubio. Rubio u shpreh se ka një interes në rritje nga ana e komunitetit ndërkombëtar për të mundësuar një armëpushim të kufizuar në Detin e Zi, me qëllim garantimin e dërgesave të pandërprera të energjisë dhe drithërave nga Rusia dhe Ukraina.
“Është gjithmonë e rëndësishme që Shtetet e Bashkuara dhe Rusia të kenë komunikim në njëfarë niveli, për shkak të rrezikut të përshkallëzimit në të ardhmen, nëse – larg qoftë – diçka do të shkonte keq. Pra, qëndrimi ynë mbetet i qartë: nëse mund të luajmë një rol ndërmjetësues për t’i dhënë fund atij konflikti, Shtetet e Bashkuara janë të gatshme ta marrin përsipër këtë rol. Dhe për ta luajtur këtë rol, na duhet mundësia për të komunikuar me të dyja palët. Ne flasim shpesh me ukrainasit; flasim me ta po aq, në mos edhe më shumë, sa ç’flasim me palën ruse.
Por duhet të jemi në gjendje të flasim edhe me palën ruse, dhe një nga mënyrat për ta bërë këtë është t’i ftojmë ata në forume si ky, ku nuk dëgjojnë vetëm nga ne, por mund të dëgjojnë edhe nga vende të tjera që janë të pranishme aty.
Sa i përket pyetjes së parë lidhur me Zelenskyn, bëhet fjalë për një takim në nivel liderësh. Kjo është diçka që i takon Presidentit ta vendosë. Nuk do ta përjashtoja si mundësi. Mendoj se Presidenti mund ta marrë në konsideratë, veçanërisht nëse pjesëmarrja e tij mund të çojë në një rezultat pozitiv. Megjithatë, nuk kam ndonjë njoftim për këtë çështje sot.
