Paulo Dybala u detyrua të largohej nga ndeshja e Romës kundër Leçes me probleme në gju dhe sipas Jose Mourinho-s, ai nuk ka gjasa të rikthehet para vitit 2023, një mundësi që automatikisht e përjashton atë nga Kupa e Botës. Sulmuesi argjentinas shënoi në ndeshjen e Giallorossi kundër Leçe-s me një penallti në kohën e duhur dhe menjëherë filloi të çalojë me probleme në gju. Jose Mourinho u detyrua ta tërhiqte nga loja dhe pas ndeshjes u shfaq tejet pesimist për gjendjen e tij, duke përmendur një problem serioz që vështirë se do ta lejojë të rikthehet në aksion para Vitit të Ri. Gjë që nëse konfirmohet në testet që do t’i nënshtrohet, do ta përjashtojë automatikisht nga Botërori i Katarit dhe do të jetë një “goditje” e madhe për vijën e sulmit të Albiceleste. “Gjendja e tij është e keqe, për të mos thënë shumë e keqe. Unë nuk jam mjek dhe nuk kam folur me ekipin mjekësor, por nga përvoja ime mund të them se nuk jemi optimistë. Pasi bisedova me të, arrij në përfundimin se ai nuk duket shumë mirë. Është e vështirë ta shohësh atë të kthehet në aksion përpara vitit 2023”, tha Mou, i cili rrezikon të humbasë yllin e tij të madh për një periudhë të konsiderueshme kohore. Kupa e Botës nis më 20 nëntor, më shumë se një muaj nga dita e sotme.
