Tiranë, 30 maj 2026 – Policia e Shtetit ka marrë në dorëzim këtë të shtunë Qendrën e parë të Çaktivizimit të Armëve të Vogla dhe të Lehta, një investim që synon forcimin e sigurisë publike dhe përafrimin e Shqipërisë me standardet europiane në kontrollin e armëve.
Në ceremoninë e inaugurimit, Drejtori i Përgjithshëm i Policisë së Shtetit, Drejtues Madhor Skender Hita, e cilësoi ngritjen e qendrës si një moment të rëndësishëm jo vetëm për institucionet e sigurisë, por edhe për mbrojtjen e fëmijëve dhe komunitetit.
“Ky moment lidhet drejtpërdrejt me sigurinë e fëmijëve tanë, që janë e ardhmja e këtij vendi, çka përbën prioritetin më të lartë në punën tonë të përditshme”, deklaroi Hita.
Sipas tij, projekti është rezultat i një bashkëpunimi mbi katërvjeçar mes Policisë së Shtetit, OSBE-së dhe partnerëve ndërkombëtarë, duke sjellë një infrastrukturë moderne për çaktivizimin e armëve dhe forcimin e mekanizmave të kontrollit.
Drejtori i Policisë theksoi se investimi ka mundësuar harmonizimin e standardeve shqiptare me praktikat më të mira ndërkombëtare, forcimin e kuadrit ligjor, trajnimin e specialistëve dhe pajisjen e strukturave me teknologji bashkëkohore.
Ndërkohë, projekti ka ndikuar edhe në rritjen e kapaciteteve të njësive K9, përmes sigurimit të pajisjeve trajnuese, si dhe në krijimin e kushteve moderne për strehimin e qenve të policisë dhe Klinikën Veterinare, inaugurimi i së cilës pritet të zhvillohet së shpejti.
Hita nënvizoi se Policia e Shtetit mbetet e angazhuar në luftën kundër armëmbajtjes pa leje dhe kriminalitetit. Sipas tij, strukturat policore sekuestrojnë mesatarisht 650 deri në 700 armë të vogla e të lehta çdo vit, së bashku me sasi të konsiderueshme municionesh, ndërsa autorët përballen me drejtësinë.
Ai vuri në dukje gjithashtu rëndësinë e fushatave sensibilizuese në shkolla dhe komunitet, të zhvilluara me mbështetjen e OSBE-së dhe partnerëve të tjerë, për të ndërgjegjësuar të rinjtë mbi rreziqet që sjell posedimi i armëve.
Në përmbyllje të fjalës së tij, Hita garantoi se Policia e Shtetit do të vijojë forcimin e kapaciteteve profesionale dhe operacionale në bashkëpunim me partnerët ndërkombëtarë, me synim luftën kundër krimit të organizuar dhe rritjen e sigurisë në Shqipëri dhe rajon.
“Përmes kësaj qendre japim një mesazh të qartë se siguria kërkon bashkëpunim, standarde të përbashkëta dhe vendosmëri të palëkundur”, u shpreh ai.
