“Drafti i parë i raportit të dëmeve të konstatuara nga tërmeti i 26 nëntorit, të cilin do të paraqitet në Konferencën e Donatorëve në 17 shkurt është përgatitur”. Zv/ministri për Europën dhe Punët e Jashtme, Etjen Xhafaj foli sot në një intervistë televizive, për procesin e rindërtimit pas tërmetit të 26 nëntorit, cilat faza kanë kaluar dhe në cilat pritet të vijojë puna më tej. Zv/ministri gjithashtu theksoi se Turqia nuk është tërhequr nga ndihma e ofruar më parë për ndërtimin e 500 shtëpive edhe pse shteti turk po përballet ditët e fundit me pasojat e një tërmeti shkatërrimtar njëlloj si Shqipëria.
“Plani është që puna të nisë në fillim të marsit, aktualisht është duke punuar. Është e domosdoshme të përfundohen projektet arkitekturore që të mos kthehemi më tek kontrolli i pakontrolluar i territorit. Po kryhen studime sizmiologjike. Zona e parë nga ku do të nisë ndërtimi është qyteti i Laçit. Aty ku do të fillohet do të ketë zhvillim të gjerë, me godina cilësore dhe me kushtet më të mira”, tha Xhafaj. I pyetur për Konferencën e Donatorëve të 17 shkurtit, Xhafaj tha se, “sipas të gjithë metodologjive, jemi në fazën e parë në atë të menaxhimit të çdo emergjence civile me spektër të gjerë dhe me impakt të gjerë territorial që ka të bëjë me menaxhimin e menjëhershëm të zhvendosjes së njerëzve. Muajin e dytë fillohet bëhet vlerësim më i thellë i dëmeve”.
“Këtu fillon dhe krijohet një faturë financiare se cilat kanë qenë dëmet e konstatuara. Në këtë fazë shihet çfarë mund të bëhet në godinat që kanë pasur dëmet. Vlerësimi nuk ka të bëjë vetëm me dëmin infrastrukturor por shihet edhe më gjerë edhe nga zhvendosja demografike”, tha Xhafaj. “Është përgatitur drafti i parë i raportit të impaktit të dëmeve, raporti është dokumenti bazë ku do të shkohet në konferencën e donatorëve ku do të flitet me kapituj të veçantë për dëmet e shkaktuara”, tha zv/ministri Xhafaj. Xhafaj shtoi se, “vlerësimi për dëmet nga tërmeti nuk është ende final, teksa përpjekja shtetërore për të mbledhur të gjitha ndihmat është e vazhdueshme”. “Ne kemi parë disa nga takimet e komitetit të rindërtimit për të barazvlerësuar, kontrolluar, koordinuar impaktin e ndihmave në terren për qytetarët, për të pasur mundësi të dalim nga kjo situatë sa më shpejt”, u shpreh Xhafaj.
