‘Në maj përfundon gjithë segmenti’, Balla në Unazën Bujqësore të Elbasanit: Në fund të shkurtit këto sera eksportojnë në Europë

Sekretari i Përgjithshëm i PS, Taulant Balla thotë se në fund të shkurtit serat e Unazës Bujqësore të Elbasanit fillojnë eksportin në vendet të Europës.

Balla gjatë inspektimit të parë të 2020 pikërisht në Elbasan, u shpreh se Unaza Bujqësore e këtij qyteti është një investim shumë i rëndësishëm i qeverisë.

Ai shton se kërkon që njëra pjesë e rrugës së unazës bujqësore të Elbasanit të jetë gati deri në shkurt. Ndërsa segmenti i plotë 7.3 km përfundon në janar.

“Me përfundimin e festave dhe me rikthimin në punë për ne është e rëndësishme përfundimi i kësaj rruger por me cilësi. Është një prej rrugëve që e quajmë me të drejtë unaza bujqësore e Elbasanit. Kjo rrugë bën të aksuesueshme prodhimet e 1400 ha ku shumica janë sera. Vetëm gjatë këtij viti në mes shkurti dhe pjesës së dytë të mblidhen rreth 2 milion rrënjë lakër Brukseli e cila ka vlerë 900 lekë të vjetra copa vetëm ky kultivar, shkon deri në 1.8 miliardë lekë për këtë zonë. Ky është vetëm një prej kultivarëve dhe kjo rrugë ka qenë një nga kërkesat e kahershme e banorëve. Erdhëm këtu për të parë nga afër këtë rrugë kaq të rëndësishme dhe ja tani po e përfundojmë. Nga janari deri në maj përfundon gjithë segmenti prej 7.3 kilometrash.”- tha Balla.

Ndërkohë kreu i Bashkisë Elbasan, Gledian Llatja ka thënë se rruga është marrë parasysh për të gjitha nevojat e komunitetit dhe shpreson që pas këtij investimi rrënjët e lakrës të mbjella të cilat janë traditë e këtyre serave të dyfishohen.

‘’800 mijë rrënjë lakër Brukseli ishin mbjellë vitin e kaluar, tani janë mbjellë 2 milion. Shpresoj të dyfishohet. Janë marrë parasysh të gjitha për këtë rrugë, trotuari për shkollën, kanalet ujitëse dhe rruga për bujqësinë. Është një nga zonat më punëtore të Elbasanit. Pas përfundimit të këtij segmenti jam i sigurt se të gjithë tregtarët e mëdhenj do të vijnë t’i marrin vetë këtu prodhimet bujqësore’’. – tha Llatja.