Nga Endri Kajsiu/
Ligji ‘anti KÇK’ prej javësh është kthyer në temën e ditës në opinionin publik, ku çdo ditë OFL informon mbi operacionet dhe punën mbi subjektet që ligji në fjalë prek. Një sondazh i Eduard Zaloshnjës i para pak ditëve tregonte se 66% e shqiptarëve e besojnë këtë luftë të intensifikuar kundër krimit. Kjo sepse të gjithë tanimë e dinë aksiomën se nëse do të godasësh krimin, duhet ta dobësosh atë së pari nga ana ekonomike. E duke ndjekur paranë është shumë më e lehtë për të shkatërruar bandat nga rrënjët.
Mirëpo, opozita dhe tarafi rreth saj ka dalë kundër këtij ligji, duke u bërë eventualisht indirekt mbështetës të krimit i cili natyrisht i trembet si djalli temjanit luftës me shtetin.
Përpos opozitës, në këtë betejë kundër ligjit që godet në zemër krimin, ka dalë edhe Avokatja e Popullit (e propozuar nga Basha në 2017), Erinda Ballanca. Pa ndonjë argument bindës, por duke përsëritur ‘argumentat’ e opozitës, Ballanca ka deklaruar sot se po vlerëson ankimimin në Gjykatën Kushtetuese të paketës anti-KÇK, të cilën qeveria tashmë e ka dorëzuar në Parlament.
Por jo vetëm kaq. Më e rëndë bëhet deklarata e saj ku duket sikur i del në krah krimit, duke argumentuar se ky ligj që godet krimin është një rrezik real ndaj të drejtave të individëve.
Ajo që Ballanca bën sikur nuk kupton është fakti se ky ligj nuk prek çdo qytetar të zakonshëm, por vetëm ato kategori që kanë kryer vepra të rënda penale për të cilat janë dënuar apo hetuar. Përpos kësaj, ky ligj nuk bën asgjë tjetër veçse detyron deklarimin e pasurië dhe justifikimin e saj nga eksponentët e krimit, me të cilin më pas merret SPAK dhe gjykata.
Është kaq e thjeshtë dhe e kuptueshme për këdo kjo betejë e cila mbështetet qartë nga qytetarët, por që Avokatja e Popullit ‘nuk e kupton’ dhe i ka dalë kundër.
Shija që të lë ky qëndrim i Ballancës, përpos faktit që është i njëjtë me atë të opozitës, është ajo e një shërbese me apo pa dashje të krimit. E kjo, kur bëhet nga Avokatja e Popullit, është shumë e rëndë. Sepse sa për opozitën, dihet se do vazhdojë sulmin ndaj çdo nisme apo ligji që kalon në parlament.
