Mbi 130 mijë turistë vizituan Valbonën gjatë vitit 2019, parajsën natyrore shqiptare ku tanimë po promovohet një lloj i ri biznesi turistik, fluturimi me helikopter në majat e alpeve. Kryeministri Rama publikoi mëngjesin e sotëm në facebook, një intervistë me Ministrin e Turizmit Blendi Klosi, nga Valbona, ku po ushtrohet ky lloj biznesi.
“Kjo zonë falë investimeve në turizëm vetëm në vitin 2019 u vizitua nga mbi 130 mijë turistë, mes tyre edhe producentë të huaj që kanë zgjedhur Valbonën, panoramë të filmave të tyre”, shkruan kryeminsitri. Ministri Klosi tha për ERTV se një hapësirë e tillë si Valbona është mundësi unikale në rajon dhe të huajt duan ta promovojnë. Së fundmi një grup slloven ka ftuar producentë filmash që po e promovojnë Valbonën përmes prodhimeve të tyre.
“Kompania sllovene që e promovon biznesin me helikopter është shumë e kënaqur dhe kjo sjell boom ekonomik për zonën”, shtoi ai. Sipas Ministrit të Turizmit, Janari i vitit 2020 ka shënuar 17. 8 % më shumë rritje vizitorësh se sa i njejti janar i vitit 2019. Në Shqipëri kanë hyrë plot 234 mijë shtetas të huaj që janë regjistruar në kufirin shqiptar. Edhe shkurti, sipas Klosit, ka filluar në mënyrë të mbarë, pasi 10 ditëshi i parë i shkurtit 2020, ka shënuar mbi 10 përqind rritje krahasuar me shkurtin e 2019. Sipas Klosit, në vitin 2019 kemi patur një bum investimesh në fushën e turizmit nga investiture vendas dhe te huaj. “Deri ne fund te sezonit besoj se keto investime do te shtohen duke shkuar në mbi 200 milionë euro investime të drejtpërdrejta nga biznesmenet lokalë shqiptarë dhe të huaj”, përfundoi Klosi.
