Autoriteti Sigurisë Ushqimore Europiane (EFSA) njofton se për koronavirusin, nuk ka prova që ushqimi është një burim apo rrugë transmetimi. Autoriteti Kombëtar i Ushqimit (AKU) bën të ditur se, EFSA po monitoron nga afër situatën në lidhje me shpërthimin e sëmundjes koronavirus (COVID-19) që po prek një numër të madh vendesh në të gjithë globin. Sipas EFSA-s, aktualisht nuk ka asnjë provë që ushqimi është një burim, ose rrugë e mundshme e transmetimit të virusit. Shkencëtarja e Autoritetit të Sigurisë Ushqimore Europiane (EFSA) Marta Hugas, tha se, “përvojat nga shpërthimet e koronaviruseve të mëparshëm, të tilla si koronavirusi i sindromës së rëndë respiratore akute (SARS-CoV) dhe koronavirusi i sindromës së frymëmarrjes në Lindjen e Mesme (MERS-CoV), tregojnë se nuk ndodhi transmetimi përmes konsumit të ushqimit. Për momentin, nuk ka prova që të sugjerojnë se koronavirusi është i ndryshëm në këtë drejtim”.
“Qendra Europiane për Parandalimin dhe Kontrollin e Sëmundjeve (ECDC) ka thënë se ndërsa kafshët në Kinë ishin burimi i mundshëm i infeksionit fillestar, virusi po përhapet nga personi në person, kryesisht nga pikat e frymëmarrjes që njerëzit thithin, kolliten ose teshtijnë. Shkencëtarët dhe autoritetet në të gjithë botën janë duke monitoruar përhapjen e virusit dhe nuk ka pasur raporte të transmetimit përmes ushqimit. Për këtë arsye, EFSA aktualisht nuk është e përfshirë në përgjigjen ndaj shpërthimeve të COVID-19. Sidoqoftë, po monitorojnë literaturën shkencore për informacion të ri dhe të rëndësishëm”, citon njoftimi i AKU-së.
