Kryeministri Edi Rama ka shpërndarë postimin e Organizatës Botërore të Shëndetësisë, OBSH në vendin tonë, e cila vlerëson punën e qeverisë dhe të mjekëve shqiptarë në parandalimin e koronavirusit.Rama thotë se OBSH po e vlerëson punën e Ministrisë të Shëndetësisë, ndërsa me ironi thotë se disa portale duan të minimizojnë punën e qeverisë.
“JA EDHE OBSH-ja NJË MINUTË MË PARË, QË TA DINI KUR TË DËGJONI TOGFJALËSHIN OBSH NGA ATA QË KANË VITE TË TËRA PA PUNË DHE TREGOJNË NGA EKRANET E NGA PORTALET SE SI BËHET PUNA”, nënvizon Rama.
Postimi i OBSH në Shqipëri:
Në shpërthimin e tanishëm epidemik të COVID-19, Zyra e OBSh-së në Shqipëri dëshiron të shprehë vlerësimin dhe mirënjohjen ndaj punonjësve të Shëndetit në Shqipëri, për angazhimin dhe përkushtimin e tyre ndaj qytetarëve në këto kohë të vështira. OBSh-ja dëshiron gjithashtu të përgëzojë qytetarët shqiptarë për bashkëpunimin në zbatimin e masave të marra nga Qeveria për të siguruar distancimin shoqëror. Këto masa janë tanimë mjeti më i fuqishëm që, të gjithë bashkë, kemi për të kapërcyer këtë krizë. Zyra e OBSh-së në Shqipëri po punon duke u koordinuar ngushtësisht me Ministria e Shëndetësisë dhe Mbrojtjes Sociale për të siguruar që vendimet e marra të jenë në përputhje me rekomandimet e OBSh-së. Në këtë drejtim, ne duam të theksojmë se vendimi për t’u testuar për COVID-19 duhet të bazohet në faktorë klinikë dhe epidemiologjikë, dhe që janë të ndërlidhur me një vlerësim të mundësisë për t’u infektuar. Testimi PCR i kontakteve asimptomatike ose lehtësisht simptomatike mund të konsiderohet në vlerësimin e individëve që kanë pasur kontakt me një rast COVID-19. Protokollet e depistimit duhet të përshtaten me situatën lokale.
