Ministri i Shtetit për Rindërtimit, Arben Ahmetaj deklaroi se të gjitha bashkitë në zonën e dëm tuar nga tërmeti i 26 nëntorit të vitit që lamë pas, kanë nisur në terren vlerësimin e dosjeve individuale të familjeve të dala nga platforma “Shtëpia ime”.
“Banesat individuale do të rindërtohen sipas modeleve të prezantuara mbështetur në parimin e dakordësuar me donatorët ‘ndërto më mirë’, sipas standardeve më të mira “EUROCOD 8”, rezistente ndaj tërmeteve deri në 9 ballë, stuhive dhe përmbytjeve, me një teknologji që kursen energji deri në 30% ose 15 mijë lekë në vit kursim për çdo familje dhe Brenda një kohe të shkurtër ndërtimi, rreth 30 ditë”, theksoi Ahmetaj.
Ministri ritheksoi angazhimin e qeverisë për bërjen të mundur që rreth 4 mijë familje të presin vitin e ri 2021 në shtëpitë e reja individuale. “Kjo maxhorancë ka në themel të vet solidaritetin dhe kujdesin për qytetarët. Shtëpitë janë si rrallëkund, dhe në vende të zhvilluara dhe shumë herë më të pasura se Shqipëria, falas. Edhe pse është një program unik, ne jemi të bindur se jemi duke bërë gjënë e duhur për qytetarët shqiptarë në nevojë”, tha ai.
Ministri po ashtu informoi se po vijohet me prezantimin e planeve të detyruara vendore në të gjitha zonat e prekura nga tërmeti. Ai u ndal në transparencën e procesit, ku theksoi se në takimin e komisionit shtetëror të rindërtimit janë ftuar si anëtar me të drejta të plota donatorët, si SHBA, KE, Turqia UNDP, UN apo Banka Botërore, ndërsa theksoi se kemi lënë të hapur pjesëmarrjen për çdo donator. Ministri tha se do të ketë ekspertë nga KE që do të atashohen pranë sekretariatit të Komisionit Shtetëror të Rindërtimit. “Brenda viti do të jenë të hapura kantieret e ndërtimit në të gjitha bashkitë e prekura nga tërmeti”, tha ai.
