Edhe pse festivali i madh europian i këngës u anulua për shkak të pandemisë, të gjithë këngëtarët pjesëmarrës promovuan këngët e tyre online, madje edhe prezantuan vendet përmes videoklipeve virtualisht.Angazhimi ka qenë maksimal edhe nga këngëtarja shqiptare Arilena Ara. Prej muajsh tashmë, këngëtarja shkodrane ka punuar në studion muzikore në Amerikë për të realizuar versionin anglisht të “Fall from the sky”. “Shaj”, siç e ka thënë edhe vetë artistja, ka lindur në fillim në anglisht dhe pastaj është përkthyer në shqip. Arilena e dashuroi që me dëgjimin e parë dhe e prezantoi po me të njëjtën dashuri edhe në Festivalin e RTSH-së.
Sot, në një intervistë ekskluzive për Eurovizionin, Arilena tregon edhe pak nga rrugëtimi i gjatë i kësaj kënge, të cilën ajo e ka bërë të shpirtit tashmë. Siç tha ajo për Eurovizionin, klipi ia ndryshon edhe profilin “e brishtë” artistes: “Këtu është një Arilena e trefishtë. Nga ajo e pafajshmja, tek e çmendura”, – thotë këngëtarja duke theksuar se kjo pjesëmarrje në Eurosong, edhe në këto kushte, e ka lumturuar shumë, sepse Eurovizioni mbetet gjithmonë një event që njeh popujt, socializon artistët, por edhe këmben kulturat e popujve europianë.
Vetëm pak ditë më parë, Arilena dha një koncert recital në sheshin “Nënë Tereza” në mbështetje të të gjithë fansave të saj, si edhe në solidaritet të plotë me gjendjen aktuale. Natyrisht, nuk ishte njëlloj për një artiste si Arilena që gjithmon komunikon me publikun, të komunikonte me heshtjen, megjithatë “Sounds of silence” ishte një zë më shumë në emër të artit që bashkon kombet.
