Skuadrat shqiptare startojnë sot sezonin e ri të Europës, duke nisur me kampionen e Shqipërisë, Tiranën. Bardheblutë do të zbresin të parët në fushë në përpjekje për te marrë një rezultat sa më pozitiv. Pasi kurorëzoi vitin jubile me titullin e munguar prej 11 vitesh, do kërkojnë pas tetë vitesh të kalojnë një tur në kompeticionet europiane. Një kualifikim që vlen shumë edhe në aspektin financiar, pasi në arkat e kampionëve të vendit do të shkonin 380 mijë euro.Në ‘’Boris Paichadze Dinamo Arena’’ skuadra e trajnerit Egbo do te përballet në orën 19:00 kundër gjeorgjianëve të Dinamo Tbilisi, ndeshje e vlefshme për raundin e dytë kualifikues te Uefa Champions League.
Kryeqytetasit janë me besimin për të kaluar më tej, teksa kundërshtari cilësohet i barabartë. Ndryshe nga herët e tjera bëhet fjalë për një ndeshje teke, ku në rast barazimi kalohet në kohën shtesë me 30 minuta dhe në fund, penalltitë zgjedhin ekipin që do të kalojë në turin e dytë, aty ku do të përballen me serbët e Crvena Zvezdën.Ndërkohë, trajneri Emanuel Egbo, i cili provon për herë të parë një eksperiencë Europiane, duket se është i qartë edhe për formacionin dhe në fushë pritet të hedhë dy nga blerjet e kësaj merkato. Nigeriani pritet te rreshtoje ne fushe një skuadër me skemën 4-2-3-1, me Ilion Lika në portë.Në mbrojtje do të jenë Vangjeli, Najdovski, që pritet të debutojë, duke zënë vendin e Muçës në qendër të mbrojtjes, ndërsa në krah të djathtë, Toli pritet të mbushë hapësirën e lënë nga Albi Doka, i cili është larguar për një eksperiencë të re në Kroaci. I vetmi shqetësim është gjendja e Hoxhallarit i cili ka ndierë shqetësime. Ne rast se nuk ia del, alternativë është Ismajlgeci. Në mesfushë do të rreshtohen Batha dhe Çelhaka, ndërsa Cobbinah, Torassa dhe Calé do te ndihmojnë Muçin, të cilit Egbo i ka besuar një vend titullari. Edhe pse përballe ka një skuadër që ka bërë historinë në Gjeorgji, ne konferencën e fundit për shtyp tekniku Egbo u shpreh se beson te kjo skuadër, forca e grupit dhe te një paraqitje pozitive e skuadrës se tij.
