Aktorja Arjola Demiri shprehu pasditen e sotme mbështetjen dhe vlerësimin e saj për punën e bërë nga kryebashkiaku Veliaj në Tiranë. Teksa po fliste në Fressh Voice, gara kombëtare për liderët e rinj në FRESSH, Demiri u shpreh se Veliaj është shembulli më i mirë për t’u marrë nga të rinjtë dhe të rejat. “Sado të mendosh se ke energjinë, ndoshta duhet provuar një mbrëmje si kjo e sotmja dhe ta ndjesh veten lumturisht të ri. Për ne aktorët, amfiteatri, skena, janë pjesë jetësore. Por ndryshe është ta shikosh këtu përballë jush. Është emocion ta shohësh të rinovuar, është emocion dhe hijeshi, edhe madhështi, ndaj gjej rastin të falenderoj Lali Erin. Nuk mund të lë pa përmendur një të shkuar jo të largët, kur isha studente në Akademinë e Arteve, Tirana qe kthyer në një geto barakesh e kioskash, saqë kur binte shi nuk kishte nevojë për çadër se kaloje pullaz më pullaz, nga shtëpia në shkollë. Falë njeriut të ndryshimit Edi Rama, kryeqyteti jonë mori shkëlqimin e merituar dhe atë për të cilin ne ëndërronim, i cili u përcoll kudo në atdheun tonë.
Sot nuk jam këtu për aktrimin. Por sinqerisht për t’ju thënë një mesazh njerëzor. Për t’ju thënë, siç do ja thoja dhe tre fëmijeve të mi: Mos lejoni asknd t’ju thotë se ëndrrat nuk mund të bëhen realitet. Mos lejoni askënd t’ju shkelë dhe t’ju thotë se ju nuk mundeni. Ju mundeni sepse dhe ëndrrat më hyjnore ju mund t’i ktheni në tokësore.
Ndaj besoj dhe nuk hezitoj, duke ëndërruar dhe njëkohësisht mos hezitoni kurrë duke mbështetur atë njeri, atë forcë politike që jeton me ëndrrën tuaj dhe i jetëson ato. Ju garantoj se askush si PS nuk është më pranë ëndrrave tuaja. Ndaj ju kam lakmi, jo vetëm për moshën e bukur po dhe për përzgjedhjen tuaj inteligjente, duke u radhitur në Fressh Voice. Tani dua të ftoj dikë që është njeriu më i mirë për ta marrë shembull, Kryetarin e Bashkisë. Z. Erion Veliaj”, tha Arjola Demiri.
