Rindërtimi/ Shkolla “Kajo Karafili” në Maminas dhe “16 shtatori” në Shijak nuk do të kenë të krahasuar me shkollat që humbën nga tërmeti

360 nxënës të shkollës “Kajo Karafili” në Maminas dhe 307 nxënës të gjimnazit “16 Shtatori”, në qytetin e Shijakut, do të studiojnë shumë shpejt në një mjedis të ri, që nuk do të ketë të krahasuar me shkollat që humbën nga tërmeti i fortë që goditi vendin tonë 26 nëntorin e vitit që lamë pas. Kryetari i bashkisë së Shijakut, Elton Arbana deklaroi sot se ritmi i punimeve në të dy shkollat është i lartë dhe ne jemi në afatin e duhur që të mund të përmbushim premtimin që u kemi dhënë nxënësve dhe mësuesve të këtyre shkollave për t’i rindërtuar ato deri më 26 nëntor.

“Këtë 26 nëntor fëmijët do të kenë mundësi të frekuentojnë mësimin në shkollat e reja”, deklaroi Arbana. Kreu i bashkisë bëri të ditur po ashtu se për ndërtimin e godinave arsimore po punohet me standarde të Bashkimit Europian. “Në të gjitha kantieret e rindërtimit punimet po vijojnë me ritme të larta dhe i gjithë Shijaku po rindërtohet”, tha më tej Arbana.