Shkencëtarët që studiojnë ndryshimet klimatike në Itali kanë arritur në përfundimin se dimri i këtij viti pritet të jetë i ftohtë. Ilmeteo.it ka siguruar raportin e studiuesve italianë, të cilët kanë zbuluar një anomali të çuditshme në një pjesë të veçantë të Oqeanit Atlantik. Një zonë e madhe e oqeanit midis Groenlandës jug-lindore dhe Islandës po shënohen temperatura sipërfaqësore që janë dukshëm më të ulëta se mesatarja.
Në kuadër të këtij studimi, mësohet se kjo anomali me kalimin e kohës mund të ndryshojë qarkullimin e termohalinës, e cila ndikon në dendësinë e ujit. Ndër të tjera thuhet se kjo prirje e ftohtë në këtë pjesë të Oqeanit Atlantik do të vijojë edhe në muajt dhe vitet e ardhshme.
Ajo do të ketë efekte edhe në Itali dhe rrjedhimisht edhe në vendin tonë duke marrë parasysh afërsinë gjeografike me vendin fqinj. Studimi konsideron se dimri i ardhshëm që pritet pas kësaj vjeshte, mund të jetë më i ftohtë dhe me reshje të dendura dëbore, ndryshe nga vitet e tjera.
