Këtu më poshtë janë fjalët e ish-trajnerit të kombëtares së Italisë, kampion bote më 2006, mbi çështjet aktuale të futbollit. Milani? Meritat e rezultateve i përkasin Maldinit. Atalanta? Gasperini po luan një futboll të shkëlqyeshëm. Nuk mungoi edhe vlerësimi për punën e Antonio Conte tek Interi dhe gradimi i Pirlos më stolin bardhezi, edhe pse pa asnjë ditë eksperiencë në këtë rol.
INTER DHE CONTE Ai është njeriu i duhur për të krijuar një ekip fitues. Antonio e bëri këtë edhe në të kaluarën. Nëse sezonin e kaluar kishte shpërthime të caktuara, e bëri që të kishte atë që mori sot, një grup lojtarësh të bollshëm dhe cilësor. Ai gjithmonë ka qenë lider, si lojtar dhe tani si trajner. Është një motivues i shkëlqyeshëm. Edhe këtë sezon, gjithashtu, teknikisht ekipi i tij mund të luajë me të gjithë, si në kampionat, ashtu edhe në Champions. Juventusi mbetet favorit për titullin, pasi ka fituar 9 tituj radhazi, por hendeku me zikaltrit më duket se është ngushtuar.
PIRLO DHE JUVE Ai ishte një lojtar shumë i talentuar. Ky talent, përveç aftësive të tij të komunikimit, çka ndoshta është ajo që ka munguar pak kohët e fundit në drejtimin teknik të Juventusit, do ta shpërblejë. Fuqia e vërtetë e një trajneri, përtej moduleve, është të hyjë në kokën e lojtarëve, për t’i bindur ata për mundësitë e tyre. Andrea ka pasur shumë trajnerë të shkëlqyeshëm si lojtar, është një person i talentuar dhe me një aftësi të madhe komunikuese. Tani po ftillon projektin e tij taktik, por jam i sigurt se do të luajë me tre sulmues, duke i dhënë ekipit ekuilibrin e duhur.
Blerja e Chiesa? Ai është një lojtar i shkëlqyeshëm, një luftëtar me karakter të fortë. Federico mund të jetë një lojtar i plotë, mund të luajë si pjesë e tridentit sulmues dhe të shënojë më shumë se 10 golat e sezonit të kaluar. Dybala? Më duket se është pjekur shumë, është një lojtar i rëndësishëm. Sidoqoftë, të jesh lojtar vendimtar nuk do të thotë të luash 70 ndeshje. Gjithashtu, mund të luash 45 ndeshje në nivel të shkëlqyeshëm, nuk ke pse të luash gjithmonë.
