Seria pozitive e Milanit vijon dhe nuk ka rrotacion apo rival ta pengojë. Stefano Pioli i gëzohet këtij fakti, teksa në një intervistë për televizionin e klubit ka analizuar disa aspekte tepër aktuale të ekipit që drejton.
Tjetër fitore e regjistruar, besoj jeni i kënaqur me rrotacionin?
Ndaj Spartës luajtëm mirë dhe shfrytëzuam si duhet situatat. Jam i kënaqur me atë që dhamë në fushë, por nuk kemi kohë për festa, pasi në pret Udineze. Kam fatin që kam shumë titullarë dhe në momente të caktuara më duhet të bëj edhe zgjedhje duke u munduar të hedh në fushë më të mirët.
Ndërkohë, Dalo nuk ju lejon të keni pengje që mbajtët në stol Teon…
Diogo mund të luajë në të dyja korsitë dhe kjo është në avantazh të tij dhe skuadrës. Është një lojtar i fortë, ashtu si Diaz, Tonali apo edhe ndonjë tjetër. Për mua janë të gjithë titullarë.
Dhe nuk keni nevojë të ndryshoni as skemë apo jo?
Kam fatin e të pasurit një organikë të mbushur me djem inteligjentë dhe tepër të aftë taktikisht. Në qëllimet tona është që të mos i japim pika referimi rivalëve dhe më shumë se sa skema, kanë rëndësi lëvizjet që gjithsecili bën në fushën e lojës.
Fitorja ndaj Spartës, a ju bën më të qetë në kuadër të kualifikimit?
Qetësia nuk duhet të na mungojë, ashtu si edhe vendosmëria. Kemi fituar dy ndeshjet e para në grup, por jemi larg kualifikimit. Më vjen mirë që kundër Spartës konfirmuam gjërat e mira që kishim treguar edhe ndaj Sëlltikut.
Pra ndeshjet me Lilën do të jenë vendimtare për kalimin e turit?
Francezët kanë talent dhe shpejtësi ndaj do të nevojitet një lojë e mirë. Gjithsesi, kemi kohë për të menduar për atë takim, por më parë duhet të punojmë për sfidën me Udinezen.
Me Benaserin kaq në formë, do të jetë më e lehtë?
Siç thashë janë të gjithë titullarë. Ismaeli po rritet shumë, po përmirësohet, por mund të bëjë edhe më shumë. Në disa momente do të ishte më vendimtar nëse do të ishte më i qartë në veprimet e tij.
Do të bëni të tjera ndryshime në formacion për ndeshjen me Udinezen?
Energjitë e shpenzuara i mbajmë gjithmonë parasysh sepse duke luajtur kaq shpesh shpenzon shumë në aspektin fizik dhe mendor. Duhet dhënë në çdo rast maksimumi ndaj ka shumë rëndësi që djemtë të jenë të gatshëm kur u kërkohet kontribut. Koha në dispozicion është gjithnjë e më e pakët, por ndaj Udinezes do të duhet të mbajmë në mendje edhe vështirësitë që në krijuam në sezonin e kaluar.
