Pas dështimit të bisedimeve për një qeveri të re të koalicionit, presidenti italian, Sergio Mattarella ka bërë thirrje për formimin e një qeverie të unitetit kombëtar. “Ndjehem i detyruar t’u bëj thirrje të gjitha forcave politike të pranishme në parlament për t’i dhënë besimin e tyre një qeverie të profilit më të lartë që nuk duhet të identifikojë veten me ndonjë formulë politike”, tha ai në një fjalim të shkurtër dje në mbrëmje. Pak më vonë, presidenca lëshoi një deklaratë sipas së cilës ish-shefi i Bankës Qendrore Europiane (BQE) Mario Draghi ishte thirrur në Quirinale për bisedime.
Draghi ishte përfolur për javë të tëra si një kryetar i mundshëm i një qeverie teknokrate. Një kabinet i tillë ka të ngjarë të jetë një zgjidhje për javët ose muajt e ardhshëm për të udhëhequr Italinë përmes problemeve të saj më të ngutshme gjatë pandemisë së koronavirusit. Negociatat e partisë të ndërmjetësuara nga presidenti i Dhomës së Deputetëve, Roberto Fico, për të ringjallur koalicionin qeverisës të qendrës së majtë të Italisë dështuan dje. Fico kishte udhëhequr bisedimet për të gjetur një shumicë parlamentare midis partive që kishin mbështetur qeverinë e mëparshme të kryeministrit, Giuseppe Conte.
Mattarella kishte kërkuar ndihmën e Ficos për të zgjidhur krizën e shkaktuar kur Conte paraqiti dorëheqjen e tij të martën e kaluar. Veprimi i Contes erdhi si përgjigje e partisë ”Italia Viva” të ish-kryeministrit, Matteo Renzi, i cili la koalicionin e qendrës së majtë, në mes të janarit, gjatë një mosmarrëveshje rreth mënyrës së përdorimit të ndihmës për pandeminë nga Bashkimi Europian. Në javët e fundit, instalimi i një qeverie teknokratësh është diskutuar si një mundësi afatshkurtër. Sidoqoftë, mendohet se Mattarella do të donte një qeveri që do të zgjasë deri në fund të legjislaturës në 2023. Një opsion tjetër, i favorizuar nga shumica e partive vetëm si një mundësi e fundit, do të ishin zgjedhjet e parakohshme.
