Jo vetëm gangsterë, njerëz të skeduar për dhunë, të dënuar për fshehje pasurie, kumarxhi dhe ish-drejtorë me dosje voluminoze korrupsioni në SPAK, por Monika Kryemadhi dhe Ilir Meta kanë përfshirë në listën e kandidatëve për deputetë të LSI-së edhe personazhe me arsim të dyshimtë, ngelësa, spiunë dhe të diplomuar në universitete që janë shkrirë në vitin 2014 nga si kioska dhe piramida universitare. Në Durrës, në emër të LSI-së kandidon Durim Hoçja, i diplomuar në Universitetin Kristal, i shkrirë nga qeveria 7 vite më parë.
Po në Durrës, Kryemadhi ka kandiduar Ramazan Topuzin, drejtor i Drejtorisë Juridike, të Sigurisë dhe Burimeve Njerëzore në Presidencë, që drejtohet nga bashkëshorti i saj, Ilir Meta i cili e ka kthyer Presidencën në një celulë të LSI-së. Topuzi ka mbaruar shkollën e lartë në Ministrinë e Brendshme 1987-1991. Në Durrës, Kryemadhi dhe Meta kanë kandiduar Blerina Bulkun, e ‘diplomuar’ te Universiteti Vitrina, i shkrirë si Kristali. Edhe një tjetër kandidat për deputet i LSI-së në Durrës, Hysni Caca është diplomuar tek ‘Kristali’.
Ndërkaq, në Fier kandidon e dytë në listë, ish-deputetja Kjedi Mehmetaj, e cila thotë se vazhdon ende studimet e larta. Arben Çuko, kandidat i LSI-së po në Fier, është diplomuar tek ‘Kristali’. Pjesë e listës së LSI-së janë edhe Juard Mutaraj, i cili vazhdon të jetë student që nga viti 2015 si dhe Entor Krakulli, i ‘diplomuar’ për drejtësi tek ‘Kristali’ në Fier. Megjithatë, Krakullin LSI-ja e ka bërë drejtor të rëndësishëm kur ishte në pushtet.
Në listën e LSI në Fier është edhe Mariglen Shehaj, i ‘diplomuar’ tek ‘Vitrinat’ si dhe Besmir Gropa i ‘diplomuar’ tek ‘Kristali’. Në Elbasan, në emër të LSI-së kandidon Franko Hakilja, i cili vijon të jetë student, ndërsa si aktivitete deklaron të qenit delegat dhe anëtar i LSI-së. Të njëjtin status deklaron edhe kandidatja Sindi Qafleshi, e cila si aktivet shoqëror deklaron të qenit anëtare e LSI-së.
Në Berat, Kryemadhi dhe Meta kandidojnë Ilir Oboni, i diplomuar për drejtësi tek ‘Kristal’. Oboni ka bërë edhe një kurs 4-mujor për polic, ndërsa deklaron një diplomë nga Shërbimi Informativ Shtetëror, diçka e çuditshme dhe e padëgjuar, pasi SHISH nuk është universitet. Ndërkaq, në Gjirokastër, nën siglën e LSI-së kandidon Erald Alika, i diplomuar në Universitetin ‘Kristal’, i shkrirë në 2014 nga qeveria ‘Rama’, pesë e të cilës ishte edhe LSI deri në vitin 2017.
Në Korçë, LSI kandidon edhe Pandi Janin, i cili thotë se është diplomuar në një universitet privat ‘Menaxhim Turizmi’, në Maqedoni. Ndërkaq, kryesuesi i listës së LSI-së në Kukës, Erblin Bulica, deklaron si arsimim ndjekjen e një kolegji profesional, ndërsa kandidatja e renditur e dyta, Fiqirete Çelaj deklaron ‘Bachelor’ për infermieri në një filanin e një universiteti në Kukës, pa specifikuar emrin.
Në Lezhë, kandidatja e LSI-së, Ertila Nikolli, e renditur e dyta në listë, është diplomuar tek ‘Kristal’. Tek ‘Kristal’ është diplomuar edhe kandidati tjetër Ded Ndreca, i dënuar në shkallë të parë për fshehje pasurie. Një tjetër kandidate e LSI-së në Lezhë, Algerta Shabani, rezulton e diplomuar tek Kristal-i. Edhe kandidati i fundit i LSI-së në Lezhë, Emiljano Gjonaj, është diplomuar tek Kristal-i, një universitet i shkrirë nga Ministria e Arsimit si kioskë dhe deformim i arsimit në Shqipëri.
Çuditërisht, një pjesë e kandidatëve të LSI-së me diploma të Universitetit Kristal kanë mbajtur poste të rëndësishme në administratë kur LSI-ja ishte në pushtet. Edhe pse një pjesë prej tyre kanë pak shanse të marrin e mandatin e deputetit, përfshirja e tyre në lista, i projekton ata për poste drejtorësh, nëse PD-LSI do të vijnë në pushtet./Shqiptarja.com
