Google shtyn kthimin në detyrë për pjesën më të madhe të punonjësve të saj në mes të tetorit duke zbatuar një politikë që kërkon që të gjithë të vaksinohen në një përpjekje për të luftuar përhapjen e variantit Delta të Covid.
Në një e-mail dërguar më shumë se 130,000 punonjësve, CEO Sundar Pichai shpjegoi se “vaksinimi është një nga mënyrat më të rëndësishme për të mbajtur veten dhe komunitetet tona të shëndetshëm”.
Kompania synon të kthejë shumicën e punonjësve përsëri në zyrë deri më 18 tetor, në vend të 1 shtatorit.
“Kjo zgjatje do të na japë kohë të kthehemi në punë duke ofruar fleksibilitet për ata që kanë nevojë”, shkroi Pichai në e-mail. Rregullorja e vaksinës do të përshtatet për t’iu përmbajtur ligjeve dhe rregullave të secilit shtet dhe do të bëhen përjashtime për arsye mjekësore dhe kategori të mbrojtura.
Nuk është e qartë se sa prej punonjësve të Google nuk janë vaksinuar ende, edhe pse Pichai e përshkroi normën si të lartë. Vendimi i Google për të zgjatur punën në distancë vjen pas një veprimi të ngjashëm nga një gjigant tjetër, Apple, i cili kohët e fundit zhvendosi planet e tij për t’u kthyer në zyrë nga shtatori në tetor.
Është hera e tretë që Google ka shtyrë datën e rihapjes së plotë të zyrave të saj. Ndërsa shumica e ndërmarrjeve po planifikojnë të rikthejnë punonjësit e tyre të paktën disa ditë në javë, ndërmarrjet e tjera në industrinë e teknologjisë kanë vendosur të lënë punonjësit të bëjnë punën e tyre në distancë përgjithmonë.
Rritja e shpejtë e rasteve gjatë muajit të kaluar ka bërë që më shumë zyrtarë të shëndetit publik të kërkojnë masa më të rrepta për të ndihmuar në kapërcimin e skepticizmit dhe dezinformatave të vaksinave. Detyrimi për t’u vaksinuar nga muaji i ardhshëm në Kaliforni prek mbi 240,000 punonjës të qeverisë.
