Presidenti amerikan Joe Biden dhe Zonja e Parë Jill Biden do të marrin një dozë të tretë të vaksinës për koronavirusin.
Lajmin e ka bërë të ditur vetë kreu i Shtëpisë së Bardhë, ndërsa arsyeja është për të ndihmuar më tej sistemin e tyre imunitar ndaj koronavirusit. Në një intervistë me George Stephanopoulos të ABC News, presidenti amerikan tha: “Ne u vaksinuam në dhjetor. Pra ka kaluar goxha kohë.”
I pyetur nëse është e drejtë që amerikanët të marrin nga një dozë ë tretë ndërsa vaksinat janë ende në mungesë në nivel global, Biden tha: “Absolutisht që po.”
“Ne po i sigurojmë pjesës tjetër të botës më shumë se e gjithë pjesa tjetër e botës së bashku,” tha ai, duke iu referuar zotimit për të dhuruar më shumë se 600 milionë doza deri në qershor të vitit 2022. “
“Ne jemi duke e mbajtur pjesën tonë të ujdisë. Ne po bëjmë më shumë se kushdo. ”
Ekipi shëndetësor i Biden njoftoi të mërkurën se, duke filluar nga shtatori, të gjithë amerikanët do të kenë të drejtë për një dozë përforcuese, 8 muaj pas marrjes së dozës së dytë të vaksinave të prodhuar nga Pfizer apo Moderna.
