Riviera e bukur shqiptare i ka rënë në sy edhe vajzës së ish-presidentit të SHBA Donald Trump, Ivanka Trump, e cila duket se ka qenë ndër turistët më special të kësaj vere në vendin tonë.
Ajo vizitoi Shqipërinë në muajin korrik, e shoqëruar nga bashkëshorti, Jared Kushner, disa miq të tyre dhe Nasser Al-Khelaifi, sheiku që është President i PSG-së.
Tare tregon se Ivanka Trump përshkoi me jaht të gjithë vijën bregdetare shqiptare, ndërsa në Përmet ka vizituar kishën e Leusës.
PJESE NGA BISEDA/ Auron Tare: Kanë ndenjur 5-6 ditë. Erdhën nëpërmjet një mikut tim dhe qëndruan në jaht dhe jo hotel. I pëlqeu sigurisht, Shqipëria është interesante. Para se të iknin në Korfuz, erdhën në Butrint dhe vende si Butrinti janë vende të jashtëzakonshme për t’i dhënë një tjetër mesazh këtyre njerëzve.
Blendi Fevziu: Në fakt ata zbritën në Tiranë apo jo dhe e bënë me jaht gjithë bregdetin shqiptar.
Auron Tare: Po nga Kepi i Rodonit, në Sazan, Porto Palermo dhe më poshtë.
Blendi Fevziu: Çfarë vizituan në brendësi të territorit?
Auron Tare: Të gjitha, i çova në Qeparo për punën George Tenet që ka një shtëpi dhe për fshatin, por edhe për t’i thënë që ai është shqiptar dhe jo grek siç kanë thënë.
Blendi Fevziu: I njohu njeri?
Auron Tare: Jo fare. Vizituan Sazanin, Porto Palermon, Qeparoin dhe në fund fare Butrintin. Bëmë një fluturim me helikopter deri në Leusë të Përmetit, një pjesë e malit po digjej atje, ishte koha e flakëve, fluturuam deri afër në kufi me Greqinë dhe u kthyem.
