inistrja e Shëndetësisë, Ogerta Manastirliu, në prezantimin para Kuvendit të Aktit Normativ që i hap rrugën mbërritjes së 500 mijë dozave “Pfizer” brenda 3 muajsh, ka informuar deputetët në lidhje me sasitë e vaksinave që do të mbërrijnë në Shqipëri, në kuadër të planit të vaksinimit masiv. “Akti normativ që miratojmë sot, i hap rrugë sigurimit në një kohë shumë të shpejtë, brenda 3 muajsh, të 500 mijë vaksinave ‘Pfizer’, seria e parë e të cilave vjen brenda tetorit. Është hapi i radhës, në një seri tashmë të panumërt hapash, në rrugëtimin tonë të nisur prej muajit dhjetor, për të sjellë në Shqipëri vaksina të sigurta dhe të certifikuara”, deklaroi Manastirliu.
Më tej, ministrja e Shëndetësisë shtoi se kanë mbërritur dhe kanë nisur të shpërndahen 188 mijë doza të vaksinës “AstraZeneca”, falë mbështetjes së Italisë si pjesë e instrumentit COVAX. “Kanë mbërritur dhe po shpërndahen sot edhe 188 mijë doza vaksine ‘AstraZeneca’, falë mbështetjes së Italisë mike, si pjesë e instrumentit COVAX, duke mbërritur në mbi 2 milionë e 262 mijë doza të ardhura në vend. Brenda këtij viti do të arrijmë në mbi 3 milionë doza të mbërritura, dhe mbi 5 milionë doza deri në vitin 2022, me kontrata e marrëveshje tashmë të siguruara”, bëri me dije Manastirliu, duke garantuar se do të bëjnë gjithçka për të siguruar vaksinat e nevojshme për çdo qytetar.
Manastirliu në Kuvend: Hyjmë në fazën tjetër të planit tonë të vaksinimit. Ministrja e Shëndetësisë dhe Mbrojtjes Sociale, Ogerta Manastirliu, në prezantimin e Aktit Normativ për 500 mijë doza vaksinash “Pfizer”, është ndalur pak dhe tek ato që sipas saj, janë disa nga shkaqet që e kanë ngadalësuar procesin. “Por vaksinimi mbetet sfida. Natyrisht, procesin e kanë vështirësuar hapësira e paarsyeshme që u dhurohet konspiracionistëve; vetëpërmbajtja e munguar e “analizuesve të gjithçkasë”; e gjithologëve që ngrenë pikëpyetje mbi vaksina të certifikuara dhe miratuara për përdorim nga organizma prestigjozë ndërkombëtarë ku punojnë ekspertët më të mirë në botë. E të mendosh që sot e kësaj dite, askush prej tyre nuk ka dalë e të na tregojë një tjetër rrugë, veç vaksinimit, për t’iu afruar fundit të kësaj pandemie”, deklaroi Manastirliu. Manastirliu ka theksuar se do të hyjmë në një fazë tjetër të intensifikimit të planit të vaksinimit me qëllim rritjen më tej të mbulesës vaksinale.
“Ne jemi gati të ecim tashmë me një marsh më shumë, me vënien në zbatim të fazës tjetër të Planit tonë të vaksinimit. Do të jemi me strukturat tona të lëvizshme në çdo universitet, e më me shumë intensitet në çdo qytet, në çdo fshat të Shqipërisë. Ekipet tona të profesionistëve do të jenë aty, për t’u ofruar qytetarëve shpjegime, vetëdijësim dhe vaksinimin falas afër vendbanimit. Ne e treguam gjatë kësaj krize të shëndetit publik me përmasa globale, se nuk do të lëkundemi. E sigurisht që nuk kemi ndërmend ta bëjmë tani, kur drita në fund të tunelit, duket gjithnjë e më qartë”, tha Manastirliu. Ministrja e Shëndetësisë tha se janë vaksinuar rreth 45 % e popullatës target me dozën e parë dhe 37 % me dy doza.
“Sot kemi mbi 1.7 milionë vaksinime të kryera. Janë vaksinuar me 1 dozë, rreth 45 % e moshave mbi 18 vjeç dhe me dy doza mbi 37 % e atyre mbi 18 vjeç. Këto shifra janë sipas përcaktimit të ekspertëve dhe aspak prej meje, përbëjnë popullsinë target +18 vjeç. Nëse përfshijmë edhe nga 1 vjeç e lart, mbulesa është mbi 35 % me një dozë dhe pothuaj 29 % e vaksinuar plotësisht. Këto janë shifrat”, tha Manastirliu.
Manastirliu ka bërë me dije se qeveria shqiptare deri sot ka disbursuar 32 milionë dollarë për blerjen e vaksinave, si dhe ka vënë në dispozicion të gjitha mjetet financiare për përballimin e pandemisë.
