Kryetari i Grupit Parlamentar të Partisë Socialiste, Taulant Balla inspektoi punimet që po kryhen për lotin e dytë të pritës së lumit Shkumbin, në pjesën perëndimore të qytetit të Librazhdit.
Në fjalën e tij, Balla tha se ndërtimi i pritës do të mbrojë zonën nga përmbytjet si dhe do të shërbejë si shëtitore për qytetarët e Librazhdit.
“Faza e parë e pritë së lumit Shkumbin nisi si një pritë për shkak se vit pas viti ardhjet e lumit Shkumbin kishin vënë në rrezik pjesën qendrore të qytetit dhe ishte e domosdoshme ndërhyrja me një projekt të madh, e cila nga një pritë lumore u shndërrua në një shëtitore ndër më të preferuarat nga qytetarët e Librazhdit, e cila na dha një efekt tjetër pozitiv, pasi na krijoi një hapësirë të re të pashfrytëzuar më parë, e cila falë projekteve të bashkisë Librazhd u shndërrua në parkun më të bukur të qytetit”, tha Balla.
Sipas Ballës, parku i shërben fëmijëve për të luajtur dhe moshës së tretë për të qëndruar pasditeve.
“Parku i qershive është sot një prej destinacioneve më të rëndësishme të qytetit. Ne do ta vazhdojmë investimin. Projekti do të jetë jo vetëm pritë lumore, por edhe një shëtitore e cila shkon përbri lumit Shkumbin, mbron qytetin nga përmbytjet dhe krijon hapësira të reja toke, të cilat bashkia Librazhd duhet të vazhdojë t’i kthejë në pjesë të Parkut të Qershive deri në pikëtakimin mes lumit Shkumbin dhe lumit Rrapun. Kjo pritë ishte e domosdoshme sepse nuk ka qenë e largët koha kur unë bashkë me banorët qëndronim këtu, teksa prisnim të shikonim nivelin e prurjeve të lumit, ku rrezikohej jeta e banorëve. Nuk ka qenë e largët koha kur prurjet e lumit hynin në banesat e kësaj zone”, deklaroi Balla.
Në përfundim të fjalës së tij, Balla theksoi se ajo që ka më shumë rëndësi është që çdo qindarkë të investohet me përgjegjshmëri dhe cilësia e punimeve të jetë e lartë, sepse bëhet fjalë për një pritë lumore.
“Një pritë lumore duhet të jetë sa e fortë aq edhe rezistente ndaj kohës”, tha Balla.
