Janari i vitit të ardhshëm do të jetë muaji kur do të duken hapat konkretë të nismës së Ballkanit të Hapur, tha sot kryeministri shqiptar Edi Rama. Nga Beogradi, ku po mbahet takimi i radhës mes liderëve të Shqipërisë, Serbisë dhe Maqedonisë së Veriut, Rama shprehet se u diskutua për lehtësimin e procedurave doganore, që “produktet të mos prishen duke pritur disa ditë në kufi”. “I gjithë fokusi ka qenë te njerëzit, te kompanitë, fermerët, punëtorët, akademikët, studentët që janë dhe përfituesit real të Ballkanit të Hapur
Më vjen shumë mirë që jemi fokusuar aty ku është dhe thelbi i kësaj nisme: si të zgjerojmë ekonomitë tona, tregjet tona, që mbeten të vogla, por që nëse integrohen me njëra-tjetrën, kthehen në faktor të rëndësishëm edhe për investimet e huaja direkte. Serbia ka bërë një hap të madh në thithjen e investimeve te huaja. Që të përfitojmë më shumë investime të huaja, që sjellin shumë më tepër punësim cilësor, duhet të ofrojmë një hapësirë më të gjerë. Na u dha mundësia të ballafaqohemi direkt me sipërmarrësit dhe me problemet e tyre reale, dhe të gjithë njëzëri kërkuan që çfarë do të nënshkruhet në Ballkanin e Hapur të jetë e prekshme në kufi.
Produktet që nuk mund të rrinë me ditë në kufi, shton koston në mënyrë marramendëse, ndërkohë që ndikon negativisht te produktet. Nuk mund të shkosh në kufi të premten dhe të presësh deri të hënën për të kaluar qumështin. Apo për të pritur tre javë konfirmimin nga agjencitë e vendeve të tjera që të marrin produktin. Rezultatet do të paraqiten në Tiranë, në takimin e radhës në dhjetor dhe do të jenë përfitime për gjashtë vendet e rajonit, jo tre”.
