Ambasadorët e katër vendeve, SHBA, Gjermani, Francë, Britani dhe të BE-së pritet të takohen me kreun aktual të PD-së, Lulzim Basha një ditë pas tensioneve të shtuara në selinë blu.
Ish-lideri i Partisë Demokratike, Sali Berisha hyri një ditë më pare selinë blu për të zhvilluar një mbledhje bashkë me 29 anëtarët e Komisionit të Rithemelimit.
Ai tha se anëtarët e Komisionit të Përkohshëm të PD-së, të zgjedhur në Kuvendin e 11 dhjetorit do zhvillojnë këtë të hënë një mbledhje në shtëpinë e demokratëve, me qëllim diskutimin e problemeve të rëndësishme të të ardhmes.
Ai deklaroi se me zyrën e Bashës nuk ka askush punë, por deklaroi se “sot vijmë këtu për të bërë një mbledhje. Deputeti Basha deri më datën 18 duhet të reflektojë për vendimin e Kuvendit më të jashtëzakonshëm në historinë e kombit”.
“Jemi këtu për të sjellë vullnetin e shumicës së demokratëve shqiptarë. Siç e shihni janë anëtarët e Komisionit të Përkohshëm të PD të zgjedhur në Kuvendin e fundit, të cilët kanë ardhur të vendosen në selinë e demokratëve dhe të diskutojnë për problemet e rëndësishme të të ardhmes. Tani ne po ngjitemi sipër. Në zyrën e Bashës nuk kemi punë. Sot vijmë këtu për të bërë një mbledhje. Deputeti Basha deri më datën 18 duhet të reflektojë për vendimin e kuvendit më të jashtëzakonshëm në historinë e kombit”. Ne nuk kemi punë në zyrën e Bashës. I ka marrë të gjitha karriget në zyrën e tij se nuk i mjafton karrigia e vet”, tha Berisha për kamerat.
Sa ai përket kallëzimit në SPAK, ai u shpreh se është një firmë turpi, duke e quajtur deputet Bashën.
“Një tjetër firmë turpi e deputetit Basha që padit në prokurorinë e tij e të Ramës kolegët e vet. S’ka akt më të padenjë”, tha Berisha.
Pas futjes në ambientet e shtëpisë së PD-së, nuk munguan as akuzat për Bashën.
Berisha e akuzoi atë për “marrjen e karrigeve”.
“Çmenduria e Bashës, ka marrë të gjitha karriget”, u shpreh ish-kryeministri i Shqipërisë.
Ky i fundit theksoi se vendimet që do të merren pas mbledhjes do të bëhen publike edhe për mediat.
Kujtojmë se aktualisht në katin e dytë të ndërtesës së PD-së po zhvillohen dy mbledhje paralele.
Në mbledhjen e Bashës të pranishëm janë Gazmend Bardhi, Alfred Rushaj, Jonila Godole, Jemin Gjana dhe Fitim Zekthi.
Sipas një njoftimi të PD-së, mësohet se po zhvillohet një takim për raportimin e Grupit të Punës për zgjedhjet në FRPD. Në këtë mbledhje i pranishëm është edhe kryetari i PD, Lulzim Basha.
Nga ana tjetër, Berisha dhe 28 anëtarët e tjerë të Komisionit të Rithemelimit janë vendosur në sallën e mbledhjes së grupit parlamentar.
Një ditë më parë Këshilli Kombëtar i PD vendosi shkarkimin e Kryetarit të Këshillit Kombëtar të PD, Edi Paloka dhe anëtarëve të kryesisë: Flamur Noka, Aldo Bumçi, Gent Strazimiri, Albana Vokshi, Oerd Bylybashi, si dhe sekretarëve: Ervin Minarolli, Ivi Kaso, Belind Kelliçi dhe Ledina Mandia.
