Presidenti ukrainas Volodymyr Zenelsky ka thënë ditën e sotme se është i hapur të bisedojë me Rusinë për paqe, por vetëm nëse do të kishte bisedime të drejtpërdrejta me Presidentin rus, Vladimir Putin.
Duke folur përmes një videoje në Forumin Ekonomik Botëror, Zelensky tha se ekziston një mundësi për të gjetur një rrugëdalje diplomatike nga konflikti nëse Putin “e kupton realitetin.”
Zelensky shtoi se një hap i parë drejt bisedimeve me Rusinë do të ishte që forcat ruse të tërhiqen në linjat që ishin në vend përpara se Rusia të fillonte pushtimin e saj në fund të shkurtit.
Zelenskyy përdori gjithashtu një pjesë të fjalimit të tij për të shprehur ngushëllimet e tij për anëtarët e familjeve të fëmijëve dhe mësuesve që u vranë të martën në një sulm masiv në një shkollë fillore në SHBA.
“Me sa di unë, janë vrarë 21 persona, mes të cilëve 19 fëmijë. Është e tmerrshme të kesh viktima në kohë paqësore”, tha ai.
Ndërsa forcat ruse bombarduan Ukrainën lindore, duke përfshirë Severodonetsk në rajonin e Luhanskut, këshilltari i Zelenskyy, Mykhailo Podolyak i shtyu qeveritë e huaja të ndërmarrin veprime për t’i bërë presion Rusisë që t’i japë fund luftimeve të saj në Ukrainë.
“Sot, e ardhmja e Evropës nuk formohet në Bruksel apo në Davos. Kohëzgjatja e kësaj lufte varet nga shpejtësia e vendosjes së sanksioneve energjetike dhe furnizimit me armë. Dëshironi t’i jepni fund luftës? Çelësi i paqes është në kryeqytetet tuaja”, shkroi Podolyak në Twitter.
Kjo pasoi një mesazh të Zelenskyt të martën vonë, në të cilin ai tha se dërgimi i granatave me raketa, tankeve, raketave kundër anijeve dhe armëve të tjera në Ukrainë është “investimi më i mirë” për të parandaluar agresionin e ardhshëm rus./
