Kryeministri grek Kyriakos Mitsotakis, në një intervistë ekskluzive për Reuters në ishullin Astypalea, është shprehur se Greqia, një pikë hyrëse për gazin natyror për Mesdheun lindor dhe mund të luajë një rol kyç në ndihmën e Evropës për të arritur autonominë energjetike.
“Ne e kemi bërë këtë çështje, unë e kam ngritur çështjen në Këshillin Evropian, tani më shumë kolegë i janë bashkuar argumentit tim, se ne duhet të rimendojmë rrënjësisht mënyrën se si po funksionon tregu evropian i energjisë elektrike dhe duhet të jemi në gjendje të përdorim gjithashtu masa më drastike si kufizimi i përkohshëm i çmimit të gazit për të siguruar që ne të kemi një treg që funksionon siç duhet.
E vërteta është se tani në Evropë ne e blejmë gazin tonë me çmimin më të lartë të mundshëm krahasuar me rajone të tjera, kontinente të tjera në botë. Pra, ky është një problem afatshkurtër që ne duhet ta trajtojmë”.
Udhëheqësi grek tha se ishte i bindur se vendi nuk do të përballet me ndonjë mungesë energjie gjatë Verës, sezonit të tij kulmor të turizmit, kur kërkesa për energji elektrike për sistemet e ftohjes rritet.
Athina ka miratuar masa me vlerë rreth 7 miliardë Euro për të ndihmuar konsumatorët të përballen me faturat e larta të energjisë.
Pas luftës në Ukrainë, Bashkimi Evropian ka kërkuar rrugë të reja të gazit natyror dhe burime alternative
“Kur bëhet fjalë për gazin nga Mesdheu lindor, mendoj se ne duhet të shikojmë të gjitha opsionet dhe duhet të gjejmë mënyrën më ekonomike për transferimin e gazit që ekziston në Qipro ose Izrael në tregun evropian. Çfarëdo zgjidhje që mund të parashikohet, sigurisht që do të përfshijë Greqinë”.
Greqia ka një terminal të gazit natyror të lëngshëm dhe po planifikon të ndërtojë dy objekte të tjera të gazit natyror të lëngshëm njëra prej tyre një strukturë lundruese në qytetin verior të Aleksandoupolis.
Mitsotakis vizitoi gjithashtu ishujt Kos dhe Pserimos, vetëm disa milje larg Turqisë. I pyetur nëse marrëdhëniet mund të përmirësohen, ai tha: “Unë mendoj se i takon Turqisë që të ndryshojë sjelljen e saj. Ne kurrë nuk kemi qenë ata që i shtyjmë kufijtë në aspektin e agresivitetit. Unë nuk shoh asnjë arsye pse Turqia duhet të ankohet sa herë që argumentojmë se kemi të drejtë kur ne pohojmë që mosmarrëveshjet tona duhet të zgjidhen bazuar në të drejtën ndërkombëtare dhe se ne thjesht nuk mund të pranojmë akuza absurde që kanë të bëjnë me sovranitetin e ishujve grekë të Greqisë”.
Tensionet midis dy aleatëve të NATO-s janë rindezur pas mosmarrëveshjeve për të drejtat e eksplorimit të energjisë në Mesdheun lindor.
