Kush shpresonte se me aperitivët në plazh do t’i hiqnin maskat, mund të kenë mbetur të befasuar në mënyrë të pakëndshme nga kjo valë e re verore e Covid-it, për shkak të përhapjes masive të variantit Omicron BA.5 edhe tek të vaksinuarit. Prej kohësh është folur se Covid do të shndërrohej në një sëmundje sezonale, si gripi ose infeksione të tjera të virusit të frymëmarrjes; por koronavirusi SARS-CoV-2 duket se po shkon drejt një rruge tjetër.
Një valë për çdo sezon. Siç shpjegohet në një artikull të Guardian, e vetmja ngjashmëri midis Covid-it dhe gripit sezonal, qëndron në faktin se me kalimin e kohës, infeksioni i SARS-CoV-2 bëhet më pak vdekjeprurëse falë vaksinave.
Tek ata që kanë marrë të tri dozat dhe ndoshta janë infektuar, simptomat mund të jenë të lehta dhe të ngjashme me gripin (kollë, dhimbje të fytit, të ftohtë, ethe, dhimbje koke, lodhje). Por ngjashmëritë me gripin përfundojnë këtu. Covid ka një ndikim shumë më shkatërrues në sistemin shëndetësor.
Viruset e frymëmarrjes me të cilët SARS-CoV-2 shpesh krahasohen përparojnë nga sezoni në të cilin moti dhe temperaturat e ftohta na detyrojnë t’i takojmë në ambiente të mbyllura, ku dhe sistemi ynë imunitar është më i dobët. Kur dimri ka kaluar, shumica e të prekurve mbeten imunë ndaj riinfeksionit për një kohë të gjatë, derisa një lloj tjetër virusi të arrijë dimrin e ardhshëm.
Përkundrazi, virusi covid tenton të përsëritet edhe disa herë tek i njëjti pritës me fytyra të ndryshme. “Fakti që ne kemi një varg kaq të shpejtë variantesh është tipari më befasues dhe kjo ka ndryshuar pamjen e valëve të reja”, tha për Guardian Stephen Kissler, një epidemiolog në Harvard.
Një variant tërheq tjetër. Në fakt, duket se nënvariantet e reja zëvendësojnë njëra-tjetrën më shpejt dhe kjo për pasojë zvogëlon kohën ndërmjet njërës valë të Covid-it dhe tjetrës. Ndërsa në vitin e parë të pandemisë, valët e reja u nxitën nga shfaqja e varianteve më të transmetueshme, më të aftë për të përhapur infeksionin, tani versionet e reja të SARS-CoV-2 konkurrojnë në aftësinë për t’i shpëtuar mbrojtjes imune dhe për të infektuar ata që ndoshta janë shëruar kohët e fundit. I njëjti person mund të infektohet me dy degë paksa të ndryshme të Omicron (BA.4 / BA.5) edhe me 28 ditë diferencë.
Vaksinat e së nesërmes. Nëse në shumicën e rasteve Covidi konsiderohet si një shqetësim dhe jo një kërcënim për mbijetesën, kjo është falë vaksinave, të cilat kanë ulur në mënyrë drastike rrezikun e vdekjes dhe sëmundjeve të rënda. Por për të kontrolluar përhapjen e infeksionit do të duhej të vaksinonim të gjithë popullsinë çdo tre muaj, një proces i pamundur nga pikëpamja logjistike dhe kostoja.
Situata mund të përmirësohet me vaksinat e gjeneratës së re; ato të afta për të mbrojtur kundër varianteve të shumta të SARS-CoV-2 ose, akoma më mirë, efektive kundër të gjithë koronaviruseve për të cilat do të duhet të presim edhe pak. Vaksinat e shumëpritura intranazale, që do të administrohen aty ku fillimisht vendoset koronavirusi i ri, do të na ndihmojnë më në fund të shkatërrojmë kapacitetin e tij të transmetimit.
