Perdja e sekreteve mbi hetimin ndaj ish-presidentit Donald Trump ra. Dokumenti që çoi në autorizimin e bastisjes së rezidencës së tij në Florida u publikua, edhe pse i redaktuar.
Por pavarësisht censurës, dokumenti përmban të dhëna që duhet ta shqetësojnë ish-kreun e shtetit. Konkretisht, ai tregon se kutitë me të cilat agjentët e FBI-së u larguan nga rezidenca “Mar a Lago” përmbanin faqe gazetash, revista, foto, por edhe 184 dokumente të klasifikuara, 25 prej të cilave “top secret”, 92 të tjera “sekrete” dhe 67 të tjera “konfidenciale”.
Dokumenti tregonte gjithashtu se hetuesit kishin prova të arsyeshme të besonin se në kompleksin në pronësi të Trump ndodheshin edhe dokumente të tjera të rëndësishme, të cilat mbaheshin në vende jo të sigurta.
Sipas autoriteteve amerikane, ky është një hetim penal serioz dhe nuk ka të bëjë vetëm me kë mban disa dokumente presidenciale në mënyrë të paligjshme.
Ai ka të bëjë me menaxhimin e sekreteve shtetërore, që përfshijnë informacionet e mbledhura nga agjentët sekretë, mbikëqyrjen e shtetasve të huaj dhe madje mbikëqyrjen e autorizuar nga gjykata të shtetasve amerikanë.
Megjithatë, në dokument nuk ka ende një tregues përse zoti Trump lëvizi dosjet në fjalë nga Shtëpia e Bardhë dhe përse ai ka qenë kaq ngurrues për t’ua dhënë ato hetuesve kur iu kërkua që në fillim.
Ky ngurrim mund t’i kushtojë shtrenjtë ish-presidentit, pasi mund të akuzohet për pengim të drejtësisë.
