BioNTech dhe Pfizer do të fillojnë një provë klinike të një vaksine të përshtatur me nënvariantet e Omicron, BA.4 dhe BA.5, kjo pasi kompania gjermane parashikon një rritje të kërkesës në fund të vitit.
Kompania humbi pritshmëritë për shitjet dhe fitimet në tremujorin e dytë pasi Komisioni Evropian rinegocioi kontratën e saj të vaksinës Covid.
Shitjet e tremujorit të dytë ishin 3.2 miliardë euro, krahasuar me vlerësimin mesatar të analistëve për 4 miliardë euro, dhe fitimet e rregulluara për aksion ishin 6.87 euro, nën parashikimin e konsensusit për 7.27 euro. Fitimi neto në këtë periudhë ishte 1.7 miliardë euro.
Megjithatë BioNTech përsëriti udhëzimin e saj të plotë për të ardhurat vjetore midis 13 dhe 17 miliardë euro, sepse dozat e planifikuara për dorëzim në tremujorin e dytë dhe në fillim të tremujorit të tretë tani do të shpërndahen në tremujorin e tretë dhe të katërt.
Shefi ekzekutiv i BioNTech, Uğur Şahin tha se kompania po zgjeronte gamën e saj të produkteve kundër Covid. BioNTech ka prodhuar doza të vaksinës së saj të parë Omicron, për nënvariantin BA. 1, që nga pranvera dhe është gati për dorëzim sa herë që miratohet nga një rregullator. Kompania pret që të jetë në gjendje të fillojë të dërgojë vaksinat për nënavariantet BA.4 dhe BA.5 që në tetor, nëse merr miratimin nga agjencitë rregullatore.
Özlem Türeci, shefi i mjekësisë, tha se të dhënat nga studimet dhe eksperimentet tek minjtë treguan se vaksinat e përshtatura për nënvariantet BA.4 dhe BA.5 shkaktuan një përgjigje më të fortë imune kundër këtyre varianteve dhe të gjitha nënvarianteve të tjera të Omicron.
Agjencia Evropiane e Barnave do të kërkojë të dhëna klinike për vaksinat e reja kundër nënvarianteve BA.4 dhe BA. 5, ndërsa Administrata e Ushqimit dhe Barnave e SHBA-së ka thënë se do të ishte e gatshme të miratonte iniciativën ndërkohë që provat janë në vazhdim.
