Shërbimi premium i rilançuar i Twitter, i cili jep etiketa verifikimi për këdo që dëshiron të paguajë 8 dollarë në muaj, ishte i padisponueshëm të premten pasi platforma e mediave sociale u përmbyt nga një valë llogarish mashtruese të miratuara si zyrtare nga Twitter.
Lëvizja e fundit parashikon një fillim kaotik për shërbimin e ri të abonimit, një nga ndryshimet e para të mëdha të bëra nga Elon Musk pas marrjes së kompanisë dy javë më parë.
Para blerjes së kompanisë prej 44 miliardë dollarësh, “pulla blu” iu jepej personave të famshëm dhe gazetarëve të verifikuar nga platforma, pikërisht për të parandaluar imitimin. Tani, çdokush mund ta marrë një të tillë për sa kohë që ka një telefon, një kartë krediti dhe 8 dollarë në muaj.
Por shërbimi i ri ra shpejt viktimë e mashtruesve me përdoruesit që parodizuan të gjithë, nga Papa Françesku te George W Bush. Gjigandi farmaceutik Eli Lilly & Co u detyrua të kërkonte falje pasi një llogari mashtruese postoi në Twitter se insulina ishte falas. Nintendo, Lockheed Martin, Tesla dhe SpaceX e vetë Musk u imituan gjithashtu si dhe llogaritë e figurave të ndryshme profesionale të sportit.
