Humbja e logjikës, u pa që në konferencën e mesditës së Sali Berishës, i cili ju kundërvu egër qeverisë së SHBA, ambasadores Yuri Kim që e quan “Guvernatore” për rastin e Ardian Dvoranit. Nëse opozita do të bëjë betejë politike për propozimin që Dvorani të jenë anëtar i Gjykatës Kushtetuese, kjo është pjesë normale e dialektikës. Ja ku është Kuvendi, komisionet, lë të shpalosin të gjitha ato argumentet që deputetët e Foltores dhe të PL-së si valvul për të shfryrë inatin ndaj gjyqtarit të vetëm të Gjykatës së Lartë e urren si Sali Berisha edhe Ilir Meta, në konflikt të hapur interesi. Pasi Dvorani është një i prekur nga katastrofa e Gërdecit, si pasojë e humbjes së jetës së vëllait të tij, ndërkohë që ka pasur një vendim minorance në vendimin e Gjykatës së Lartë për përgjimin Meta-Prifti në vitin 2011.
Ky është tashmë fakt i njohur, e pas këtyre dy ngjarjeve që subkoshienca e çiftit politik të “opozitës sovraniste”, çdo inat e tërsëllime që ata nxjerrin nga goja, nuk e ka vlerën e një logjike të ftohtë apo argumentuese mbi një opinion për një kandidaturë për institucionin që intepreton ligjin themeltar të shtetit. Megjithatë, ajo që Berisha nuk e gëlltit dot është se qeveria e Shteteve të Bashkuara të Amerikës, në shkurt të vitit 2021, shpalli Ardian Dvoranin si “Kampion të Antikorrupsionit”. Vendimi për Dvoranin ka ardhur pak muaj para sanksioneve dërrmuese për Sali Berishën. Në njoftimin e Departamentit të Shtetit për këtë çështje thuhet:
“Në të gjithë botën, korrupsioni kërcënon sigurinë dhe stabilitetin, pengon rritjen ekonomike, minon demokracinë dhe të drejtat e njeriut, shkatërron besimin në institucionet publike, lehtëson krimin transnacional.
Administrata e Biden pranon që ne do të jemi të suksesshëm në luftimin e këtyre çështjeve duke punuar në bashkëpunim me partnerë të përkushtuar, duke përfshirë individë të guximshëm që përkrahin përpjekjet antikorrupsion dhe vendet që punojnë për të përmbushur zotimet e tyre ndaj standardeve ndërkombëtare të antikorrupsionit.
Për atë arsye, unë jam duke shpallur një Çmim të ri Ndërkombëtar të Kampionëve Antikorrupsion, duke njohur individë që kanë punuar pa u lodhur, shpesh përballë fatkeqësive, për të mbrojtur transparencën, për të luftuar korrupsionin dhe për të siguruar llogaridhënie në vendet e tyre. Siç e ka theksuar Presidenti Biden, angazhimi ynë për të vërtetën, transparencën dhe llogaridhënien është një mision që ne duhet të jetojmë në shtëpi dhe ta ilustrojmë jashtë. Unë përgëzoj përkushtimin e këtyre 12 individëve trima për të njëjtat ideale.
Të nderuarit janë: Ardian Dvorani i Shqipërisë, Diana Salazar i Ekuadorit, Sophia Pretrick i Shteteve të Federuara të Mikronezisë, Juan Francisco Sandoval Alfaro i Guatemalës, Ibrahima Kalil Gueye i Guinesë, Anjali Bhardwaj i Indisë, Dhuha A. Mohammed nga Iraku, Bolot Temirov të Republikës së Kirgistanit, Mustafa Abdullah Sanalla të Libisë, Viktor Sotto nga Filipinet, Francis Ben Kaifala nga Sierra Leone dhe Ruslan Ryaboshapka të Ukrainës”, – shprehet Blinken”. Pra është e qartë se Dvorani nuk është as i vetmi por, si një model i një lufte që ai si gjyqtar edhe pse të pabarabartë, ka zhvilluar në këtë rast me njerëzit e kupolës së “të paprekshmëve” siç i quajnë enturazhi i tyre. E në këtë rast, Berisha tha se duhet të ndërtohet një qëndrim politik i PD-së kundër vendimit të SHBA, me një aksion që përfshin, letra, peticione, apo aksione proteste. Pra që në thelb ka kontestimin ndaj qeverisë amerikane.
Pasi Dvorani është zgjedhur “kampion” sepse është antipodi i Berishës e i Metës në këtë rast. Kush nuk e sheh, le të mos e shikojë, por fakti qëndron. A, duan siç thotë Manjani se “Reformën ku ta keni” pastaj ky s’është argument por mllef. Në thelb është Dvorani modeli anti-pandëshkueshmëri, edhe pse realisht nuk se është vrarë si Falkone e Borselino. Por tragjedia e ka prekur familjen e tij të afërt në Gërdec. Ndaj ky ishte një motiv destabilizimi që dy aleatët që e kthyen Dvoranin si simbol, kur në fakt nuk kishin pse, morën në fytyrë boomerangun që e lëshuan. Ndërkaq, pasdite Foltorja ju lëshua sërish inatit për të kërkuar që deputetët e Berishës të jenë pjesë e grupit parlamentar të PD-së, duke provokuar sherr e ulërima. Gjithë këtë zhurmë, si Flamur Noka, si Bylykbashi, mund ta bënin në muajin shtator, kur konstituohet sezoni i ri i Kuvendit dhe rikonfirmohen grupet parlamentare. Nuk e bënë, pasi panë që kishte një ndarje mes dy grupeve në opozitë, e donin që me kalimin e kohës të bindnin njerëzit të vijnë me ta.
Pra në shtator mund ta bënin betejën e të kërkonin që siç tha Berisha, Luçiano Boçi të jetë kryetar i grupit të PD-së dhe të merrnin edhe grupin, siç morën selinë. Këtë betejë Berisha nuk donta ta bënte pasi mendoi se do t’i dalë si 8 janari. E sot, kur gjykata duhet të shprehet për të ashtuquajturën çështjen e vulës së PD-së, ata dolën duke bërtitur, jo se e kishin me Kuvendin, por me gjykatën. Pasi edhe me rastin e Dvoranit, vota kundër për të qenë anëtar i Gjykatës Kushtetuese është akt politik. E sipas gjasave kundër do të jetë edhe grupi Alibeaj. Por Berisha e Meta nuk duan t’i bashkojnë votat me PD zyrtare për të mos e quajtur veten bisht. Sipas gjasave, do të bëjnë zhurmë e largohen, ngaqë si faktor politik janë drejt irilevancës politike.
