14 Shkurt, Tiranë- Instalohen aparaturat e teknologjisë së lartë në Spitalin e Ri të Sëmundjeve të Brendshme, investimi më i madh i këtyre tre dekadave në shëndetësi. Ministrja e Shëndetësisë dhe Mbrojtes Sociale, Ogerta Manastirliu, bashkë me shefat e shërbimit dhe drejtuesit e QSUT, kanë inspektuar nga afër instalimin e angiografit të ri në Spitalin e ri të Sëmundjeve të Brendshme.
“Angiografi është instaluar në Spitalin e Sëmundjeve të Brendshme që do të fuqizojë padyshim shërbimin e Hemodinamikës edhe sigurisht do t’i hapë rrugë edhe ndërhyrjeve të tjera invasive dhe të kombinuara. Është vërtetë një prej hapave të modernizimit të mëtejshëm të shërbimeve në sëmundjet interne në këtë spital të ri, do të pasohet menjëherë nga transferimi i aparturave të tjera, por kjo është një aparaturë e re që rrit edhe në numër ndërhyrjet invazive dhe synon edhe kompleksitetin e ndërhyrjeve invazive në zemër, si dhe për aspekte të tjera të proçedurave që ky aparat shërben”, -tha Manastirliu.
Ministrja e Shëndetësisë dhe Mbrojtjes Sociale bëri me dije se spitali i ri ultra-modern do të hapet brenda muajit mars dhe do të ofrojë për qytetarët shërbim me standarte evropiane.
“Ne duam që brenda muajit mars të fillojmë funksionimin e këtij spitali. Urgjenca polivalente do të jetë një shërbim i cili transferohet në spitalin ekzistues, por tashmë edhe me modalitete të reja, edhe me një mënyrë të re organizimi dhe fakti që tashmë do të kemi një spital të gjitha ekzaminimet përsa i përket urgjencës edhe përsa i përket intervencionit do të ketë të gjithë aparturat e nevojshme dhe do të krijojë më shumë lehtësi, më shumë fleksibilitet, por edhe më shumë dinamikë në trajtimin e raste dhe shërbime më cilësore”,-tha Manastirliu.
Spitali i Ri i Sëmundjeve të Brendshme në QSUT, një investim madhor i cili do të sigurojë standardet më të larta europiane në çdo aspekt, ka një kapacitet prej 350 shtretër. Spitali i ri i Sëmundjeve të Brendshme do të ofrojë shërbimin e mjekësisë interne, shërbimin e reumatologjisë, alergologjisë, dermatologjisë dhe fizioterapisë që aktualisht ndodhen në godina të tjera të QSUT, dhe së bashku me shërbimet ekzistuese, ato të gastrohepatologjisë, hematologjisë, endokrinologjisë, nefrologjisë, dializës, njësisë së kardiologjisë, hemodinamikës dhe reanimacionit të kardiologjisë do të kompletojnë profilin e një spitali të mirëfilltë të sëmundjeve të brendshme.
Spitali i ri do të ketë edhe një spital ditor me 60 shtretër, për rritjen e eficiencës së shërbimeve.
Spitali i ri i Sëmundjeve të Brendshme do të ketë 9 salla leksioni dedikuar studentëve të mjekësisë, ku do të zhvillohen praktikat mjekësore, si dhe edukimi në vazhdim.
