Meteorologia Lajda Porja ka bërë parashikimin e motit për ditët në vazhdim.
Në një lidhje direkte me “Breaking” në Top News ajo ka treguar se mëngjesi i sotëm ka qenë një mëngjes tipik dimri, ku në qytetin e Peshkopisë është regjistruar temperatura -4 gradë. Ndërsa ditën e nesërme pritet përmirësimi i motit, ku temperaturat do të rriten me 3-4 gradë.
Lajda Porja: Një mëngjes tipik dimri do thoja sot, ftohtë në të gjithë territorin shqiptar, madje në Peshkopi është regjistruar temperatura -4 gradë, maksimalet sjellin një rritje me dy gradë për shkak se prezenca e kthjellimeve ka qenë që në orët e para të mëngjesit dhe do të jetë prezente, ku do të ngjitet termometri në 16 apo 17 gradë.
Moti do të jetë i qëndrueshëm, vranësira të lehta dhe kalimtare do të shfaqen vetëm në orët e para të pasdites dhe kryesisht në zonat verilindore dhe juglindore. Megjithëse do të ketë vranësira gjatë ditës së sotme, nuk pritet të ketë reshje. Ka patur një përmirësim të ndjeshëm krejt ndryshe parametri i erës duke qenë se dje ka qenë shumë problematike, sot era do të jetë kryesisht e lehtë dhe në disa zona mesatare, por jo më shumë se 30 km në orë.
Dita e nesërme do të ketë akoma përmirësim më të dukshëm të situatës termike, nesër do të kemi 3-4 gradë rritje në vlerën minimale dhe maksimale duke bërë që edhe në zonat malore të jemi në vlerën -1, zona të izoluara -2 dhe maksimale do të ngjiten sërish në 20 gradë celsius. Përsa i përket motit, mbetemi në motin e kthjellët, vranësira të lehta dhe kalimtare të cilat janë të spostuara kryesisht në orët e mbrëmjes. I gjithë territori do të jetë me kthjellime, me vranësira dhe pa reshje.
