E diela e 5 marsit do të jetë ditë zie kombëtare për të nderuar viktimat e aksidentit të rëndë hekurudhor në Greqi, ku humbën jetën shumë persona, midis të cilëve edhe shtetas shqiptarë.
Kryeministri Edi Rama publikoi vendimin e Qeverisë që shpall ditën e zisë kombëtare.
“Tragjedia e Greqisë është edhe tragjedia jonë, dhimbja për jetët e humbura në aksidentin e tmerrshëm është edhe jona dhe ky është një nga ato momente jetësore, kur një humbje e madhe tek fqinji të tregon më shumë se sa njëqind gëzime që jetët tona janë të ndërlidhura pazgjidhshmërisht, e se duhet të bëjmë çmos që t’i bëjmë ato sa më të mira, duke bashkëpunuar gjithnjë e më shumë me njëri-tjetrin”,u shpreh Kryeministri Rama.
Ditën e dielë Shqipëria do të nderojë me një ditë zie viktimat e tragjedisë, duke u bashkuar simbolikisht me Greqinë mike me flamurin kombëtar të ulur në gjysmë shtize”, përfundoi Kryeministri Rama.
