Kandidati i Partisë Socialiste për kryetar bashkie në Shkodër, Benet Beci ka parqitur disa elementë të tjerë kryesorë që do jenë pjesë e projektit të portit te Ura e Bunës, projekti që do të lidhë Velipojën me Ulqinin, që u firmos në mbledhjen mes qeverisë shqiptare dhe asaj malazeze në Podgoricë.
Përmes një statusi në llogarinë e tij të “Facebook” Benet Beci bën me dije se ndërtimi i portit dhe i muzeut të lundrimit krijon dy elemente të ndërthurura që sjellin në vëmendje një prej elementeve që e kanë bërë Shkodrën një qendër të rëndësishme ekonomike në rajon.
Më tej ai shton se lundrimi mbi liqen nuk është më një ëndërr teksa thekson se: “Bashkia Shkodër, në bashkëpunim me operatorët e interesuar turistikë, do të bëjë të mundur një linjë periodike lundrimi gjatë sezonit turistik nga Shkodra drejt Shirokës e Zogajt. Do të bëjmë çdo përpjekje për të pasur transport sa më ekologjik model në Liqen.
Kthimi i lundrimit mbi liqen dhe Bunë nuk është më vetëm një ëndërr.”
Postimi i plotë:
Po nis sonte paraqitjen më të detajuar të elementeve kryesore të projektit për HYRJEN E SHKODRËS.
Porti tek Ura e Bunës
Për shekuj me radhë brigjet e Bunës në të dyja anët e lumit, në zonën ku tani ndodhet ura e Bunës, kanë qenë një zonë që priste dhjetëra anije duke ngarkuar e shkarkuar mallra apo peshk nga Buna e Liqeni. Aty pranë kishte punishte për ndërtimin dhe riparimin e varkave, varka që ishin të famshme për format e tyre të bukura dhe siluetat plot stil.
Ndërtimi i portit dhe i muzeut të lundrimit krijon dy elemente të ndërthurura që sjellin në vëmendje një prej elementeve që e kanë bërë Shkodrën një qendër të rëndësishme ekonomike në rajon.
Porti ka një dimension 60 me 20 metra. Ka një platformë lundruese që krijon akses të kollajtë për në mjetet lundruese dhe lidhet me bregun me një urë këmbësore elegante.
Porti do të lejojë ankorimin dhe lundrimin e varkave dhe trageteve për në Shirokë dhe Zogaj (molet e të cilave po përfundojnë) dhe së shpejti edhe drejt moleve të tjera dhe portit të VirPazarit në pjesën malazeze të liqenit. Porti do të shërbejë për udhëtimet për dhe nga lumi Buna pasi të kryhen studimet dhe ndërhyrjet e nevojshme për ta bërë atë të lundrueshme.
Bashkia Shkodër, në bashkëpunim me operatorët e interesuar turistikë, do të bëjë të mundur një linjë periodike lundrimi gjatë sezonit turistik nga Shkodra drejt Shirokës e Zogajt. Do të bëjmë çdo përpjekje për të pasur transport sa më ekologjik model në Liqen.
Kthimi i lundrimit mbi liqen dhe Bunë nuk është më vetëm një ëndërr. #shkodrapozitive
