Përfaqësuesi i Bankës Botërore në Tiranë Emanuel Salis, u pyet gjatë një konference për mediat me kryeministrin Edi Rama, në lidhje me korrupsionin në qeveri si edhe ish-ministrat që janë arrestuar apo që janë në hetim. Përfaqësuesi i BB-së u shpreh se me qeveria ka qenë shumë bashkëpunuese dhe se çdo investim i tyre në vendin tonë ka qenë transparent dhe i qartë. Sipas Salis përvoja në Shqipëri ka qenë e gjitha në përputhje me standardet dhe rregullat e Bankës Botërore.
‘Nuk mund të flas për treguesit e organizatave të tjera mendoj se nga ana e BB-së ne jemi të vëmendshëm dhe të vetëdijshëm që qeverisja është një punë në progres dhe përmirësimi i qeverisjes është pjesë e vlerave tona dhe objektit tonë. Sa herë që bashkëpunojmë me qeverinë jemi të kënaqur. Çdo gjë është transparente është e qartë që paratë alokohen në mënyrë të përsosur dhe të qartë. Për ne kurdo që shohim mundësinë për të përmirësuar institucionet jo vetëm në kuadër të projekteve që ne mbështesim. Përvoja jonë në Shqipëri me projektet që kemi zbatuar është në përputhje me të gjitha standardet dhe rregullat tona. Jemi të angazhuar për të përmirësuar qeverisjen aty ku BB mund të kontribuojë. S’ka më ryshfete kur njerëzit shkojnë të marrin dokumente pasi merren online. Për E-Albania duhet të jemi krenar pasi ka një trend shumë të mirë dhe do të punojmë dhe më shumë,’- u shpreh Salis.
