Analisti politik, Jusuf Thaçi, përmes një shkrimi në llogarinë e tij në Facebook ka reaguar pasi janë publikuar përgjime për takime dhe koordinime që deputetja e partisë në pushtet i ka bërë në emër të Qeverisë së Kosovës me Listën Serbe dhe kriminelin e sanksionuar nga Shtetet e Bashkuara të Amerikës dhe Britania e Madhe, Milan Radojiçiç, për disa nga çështjet politike në Kosovë.
“Me rëndësi është t’i kundërvihemi Shqipërisë dhe kryeministrit të saj, ndërsa bashkëpunimin me Listën Serbe dhe përfaqësuesit e saj e kemi obligim kushtetues”, ka shkruar Thaçi në Facebook.
“Rroftë Kosova kokë-lartë me Shqipërinë e bisht-ulur me Listën Serbe”.
Por, Kusari-Lila e ka mohuar se ka komunikuar me Radojeçiç-in, duke thënë se nuk ka fare numër të telefonit të këtij të fundit.
“Unë nuk kam as numër, as komunikim me Milan Radojiçiçin”, tha ajo.
“Për mua kontakt në Kuvendin e Kosovës kanë qenë dy përfaqësues, shefi i deputetëve Igor Simiç dhe Slavko Simiç”, ka thënë përçartazi Kusari-Lila edhe pse në përgjim dëgjohet duke e konfirmuar se ka pasur bisedë me kriminelin e kërkuar nga organet e rendit për rreth “2-3 minuta”.
Kusari-Lila ka thënë se kontakti me ish-deputetin serb ka qenë në suaza të normales dhe se është biseduar për votimin e tri projektligjeve: Ligji për Festa Zyrtare, Ligji për Liritë Fetare dhe Ligji për Vetëqeverisjen Lokale, ndërsa ka mohuar të ketë pasur kontakt me dikë tjetër nga Lista Serbe.
“Komunikimi ka qenë tërësisht në bazë të komunikimit brenda kuvendit, brenda seancës për agjenda. Kanë qenë tri agjenda vazhdimisht që e kanë përcjellë këtë komunikim: Ligji për Festa Zyrtare, Ligji për Liritë Fetare dhe Ligji për Vetëqeverisjen Lokale”, shtoi ajo.
