Qeveria shqiptare miratoi të mërkurën e 19 korrikut marrëveshjen me Mbretërinë e Bashkuar për transferimin e personave të dënuar.
“Miratimin, në parim, të marrëveshjes zbatuese të marrëveshjes, ndërmjet Republikës së Shqipërisë dhe Mbretërisë së Bashkuar të Britanisë së Madhe dhe Irlandës së Veriut, për transferimin e personave të dënuar, sipas tekstit që i bashkëlidhet këtij vendimi dhe është pjesë përbërëse e tij”, shkruhej në botimin e faqes zyrtare të VKM-ve.
Mediat britanike kanë zbuluar se Britania do t’i paguajë Shqipërisë të paktën 4 milionë paundë në vit për të marrë 200 nga të burgosurit e saj më të rrezikshëm sipas marrëveshjes së ratifikuar.
Këto fonde, sipas “The Telegraph”, janë për të paguar për rinovimin e burgjeve, sigurinë shtesë, punëtoritë, pajisjet e rehabilitimit dhe trajnimin e rojeve.
Do të ketë një grup të përbashkët mbikëqyrës për të parandaluar keqtrajtimin e të burgosurve.
Qeveria shqiptare do të hartojë një raport vjetor për të burgosurit dhe kushtet e tyre, ndërsa qeveria e Mbretërisë së Bashkuar do të ruajë të drejtën për të kryer kontrolle fizike.
Çdo vend mund ta përfundojë marrëveshjen me njoftim me shkrim dy muaj.
Detajet gjenden në një dokument zyrtar, të parë nga “The Telegraph”, që finalizon marrëveshjen, të zbuluar për herë të parë nga kjo gazetë.
Mes 200 të transferuarve janë 17 të burgosur të përjetshëm, përfshirë Koci Selamaj, 36 vjeç, vrasësi i mësueses Sabina Nessa, 28 vjeç.
Ai u burgos për të paktën 36 vjet për rrahjen dhe mbytjen e saj për vdekje në një park në juglindje të Londrës.
Selamaj ka vuajtur deri më tani vetëm dy vjet, që do të thotë që Britania e Madhe do t’i paguajë autoriteteve shqiptare 400 mijë paundë për ta burgosur për 34 vitet e mbetura të dënimit të tij.
Qeveria ka kërkuar garanci se të drejtat e njeriut të të burgosurve shqiptarë do të mbrohen, ndërsa shqiptarët kanë kërkuar që ata të paguhen për çdo grup “shumës” përpara se të pranojnë grupin e radhës të kriminelëve.
Masa është pjesë e një përpjekjeje më të gjerë për të dëbuar shqiptarët e burgosur për krime në Britani.
Sipas një marrëveshjeje të veçantë, kriminelët shqiptarë do të lirohen gjithashtu deri në një vit më herët dhe do t’u jepen grante prej 1 mijë e 500 paundë për risistemim nëse pranojnë të deportohen dhe të mos kthehen më në Britani.
Në fund të vitit 2022, pesëdhjetë të burgosur dolën vullnetarë për t’u transferuar nga burgjet britanike në ato shqiptare si pjesë e marrëveshjes së re, zbuloi asokohe “Daily Mail”.
Të gjithë të burgosurit e dërguar në shtëpi do të vuajnë dënimin e plotë të vendosur nga gjyqtarët e Mbretërisë së Bashkuar.
Deri më tani, deportimet e “Home Office” në Tiranë përfshinin ose të ndaluar që kanë mbaruar dënimet në Mbretërinë e Bashkuar ose njerëz që ndodheshin në Britani ilegalisht, shpesh pasi kalonin Kanalin me varka të vogla.
Një burim i qeverisë shqiptare deklaroi për gazetën britanike se bisedimet intensive mes Ministrisë së Drejtësisë së Britanisë dhe ministrit shqiptar Ulsi Manja, kishin çuar në një pakt për transferimet e para.
“Ne kemi kapacitete të kufizuara në burgjet tona. Por për të treguar se jemi gati të përmbushim detyrimet tona ndaj Britanisë së Madhe, ne kemi rënë dakord të presim 50 shqiptarë që kanë shprehur gatishmërinë për t’u kthyer”, shtoi burimi.
Mbretëria e Bashkuar dhe Shqipëria arritën një marrëveshje fillestare për të hequr shkelësit shqiptarë në korrik të vitit 2021.
Kuvendi i Shqipërisë ratifikoi paktin dy muaj më vonë. Por, sipas burimeve shqiptare, burokracitë penguan efektivitetin e marrëveshjes.
