Shqipëria me ardhjen e sezonit të verës ka filluar të importojë energji për të plotësuar nevojat e saj. Janë gati 24 milion euro të harxhuara në muajin korrik, ndërsa koorporata po përpiqet të mbajë nivelin e Kaskadës në mënyrë optimale, duke e shfrytëzuar pjesërisht.
KESH ka blerë energji me çmime mesatare prej 105 eurosh, deri në tre herë më ulët se e njëjta periudhë vitin e kaluar.
Gjithashtu Shqipëria pati një vit të mirë hidrik dhe kjo ka bërë që vendi të eksportojë rreth 36 milionë euro në gjashtë muajt e parë, por sipas ekspertëve gjendja financiare e korporatës është ende negative
“Situata financiare e KESH nuk duket optimiste pasi ka nga viti i kaluar borxhe të akumuluara. Është me bilanc negativ mbi 256 mln euro dhe këto arkëtime janë kryer kur ka pasur mbiprodhim nuk e përmirësojnë situatën ekonomikë të koorporatës”- tha Azmer Duleviç.
Ndërkohë blerjet vijojnë të bëhen jashtë bursës së ngritur ALPEX. Kjo sipas ekspertëve është një sinjal negative për tregun
“Bursa shqiptare që u lançua ishte shumë herët, duhet të ishte lançuar njëkohësisht me shtetin e Kosovës që të kishte më shumë energji si mall i prodhuar dhe likuiditeti do të ishte më i madh. Bursa ALPEX nuk i ka sjellë asnjë përfitim sektorit energjitik por vetëm ka marrë”– tha Azmer Duleviç.
Qeveria ka zgjatur sërish gjendjen e emergjencës për furnizimin me energji elektrike, duke bërë përgjegjëse KESH për sigurimin e sasisë së nevojshme dhe i vendos detyrimin e furnizimit publik HEC-eve private, duke mos i lejuar të dalin për shitje në treg të lirë.
