Në 6 mujorin e parë të këtij viti, eksportet e vajit të ullirit u rritën në mbi 4,100 tonë, nga mesatarisht 80 tonë që ka eksportuar historikisht Shqipëria, një rritje kjo me 52 herë në sasi dhe 33 herë në vlerë, duke e shitur produktin tonë më shtrenjtë në tregje.
Shifrat u njoftuan nga Ministrja e Bujqësisë dhe Zhvillimit Rural Frida Krifca. Në Çermën e Sipërme, Divjakë, ministrja e Bujqësisë dhe kryetari i Bashkisë Divjakë, Josif Gorrean morën pjesë në takimin e grupit të punës që po zbaton programin “Mbështetja e eksportit të vajit të ullirit nëpërmjet përmirësimit të cilësisë”, me Këshillin e Agrobiznesit Shqiptar, prodhues e përpunues të vajit të ullirit.
Ministrja tha se “në 6 mujorin e parë të këtij viti, i kemi rritur eksportet e vajit të ullirit në mbi 4,100 tonë, nga mesatarisht 80 tonë që ka eksportuar historikisht Shqipëria. Jemi rritur kështu me 52 herë në sasi por edhe 33 herë në vlerë, duke shitur produktin tonë më shtrenjtë në tregje me vlerë të shtuar. Një arritje e rëndësishme falë masave që u morën që në Dhjetor, në kushtet e superprodhimit të vajit të ullirit, ku me angazhimin e Grupit Teknik, KASH, mbështetjen e RISI Albania dhe me specialistët tanë më të mirë në kulturën e ullirit kryem në kohë identifikimin e sasive të mbetura tek fermerët, grumbullimin dhe analizat për standardizimin e sasisë së vajit të ullirit duke çliruar më pas rrugën drejt tregjeve të eksportit”.
“Të gjithë jemi dëshmitarë që sot, fermerët nuk ankohen për sasi vaj ulliri të mbetura dhe për më tepër për çmime të pakënaqshme. Fakti që ne jemi rritur 33% në vlerë, brenda kësaj kohe, tregon që ne e kemi shitur vajin e mbetur në tregje me vlerë të shtuar”, u shpreh Krifca.
“Marrëveshja me homologun italian, bëri të mundur që sasia më e madhe e vajit të ullirit të eksportohej drejt Italisë, me të cilët kemi forcuar partneritetin për të përfituar dijen dhe eksperiencë në shtimin e vlerës në kulturën e ullirit”, vijoi Krifca .
Gjatë fjalës së saj, Krifca u ndal në potencialet ende të pashfrytëzuara që ka Shqipëria në fushën e ullirit dhe prodhimit të vajit të ullirit, që mund të elaborohen më tej përmes bashkëpunimit të ri me shtetin Italian.
“Ne kemi mbi 12 milionë rrënjë ullinj të mbjellë në territorin e vendit dhe 10 milionë prej tyre janë aktualisht në prodhim. Janë rreth 250 fabrika që prodhojnë vaj ulliri dhe 95% e prodhimit të ullirit shkon për prodhimin e vajit të ullirit. Me homologun italian kemi nisur një partneritet të rëndësishëm bashkëpunimi në fushën e bujqësisë dhe unë kam marrë angazhim bashkë me ministrin ministrit italian të Bujqësisë, Francesco Lollobrigida të mbështesim respektivisht dy vendet tona për të bërë më të mirën në zgjerimin e shkëmbime tregtare bujqësore. Ne konkretisht kemi nevojë për dijen dhe eksperiencën italiane për rritjen e vlerës nga kultura e ullirit”, theksoi ministrja.
Ajo tha se “ambicja jonë është krijimi një brandi të përbashët shqiptaro-italian të vajit të ullirit”.
“Që do të thotë që vaji i ullirit tipik shqiptar, i certifikuar dhe i standartizuar me teknologji italiane të avancuar, të ofrohet në tregjet ndërkombëtare si një brand i përbashkët.”
Në këtë kuadër, vijoi Krifca, po ridimensionojmë një projekt me qeverinë italiane, me një fond 3.6 milionë euro, i cili do të vendoset në funksion te implementimit te teknologjive bashkëkohore dhe mekanizimit që nga kultivimi i ullirit e deri në përpunimin e tij, me qëllim rritjen e cilësisë së këtij produkti.
Ministrja e bujqësisë shprehu angazhimin për rivitalizimin e panel testit shqiptar, për të arritur atë cilësi maksimale që i duhet sektorit dhe vijimin e mbështetjes për zhvillimin e ullishtarisë.
“Masë tjetër për kulturën e ullirit është edhe mbështetja e fermerëve këtë vit me naftë pa taksa për punime të mekanizuara, duke i Iehtësuar ata nga kostot e prodhimit. Gjithashtu për këtë vit parashikojmë ngritjen e laboratorëve të akredituar me qëllimin ofrimin falas së analizave për cilësinë e vajit të ullirit. Ndërsa parashikojmë të shtojmë kapacitetet grumbulluese, depozituese, paketuese dhe etiketimin te vaji i ullirit”, deklaroi Krifca.
