Në një takim të drejtuesve të lartë të NATO-s, kryetari i Komitetit Ushtarak të aleancës admirali Rob Bauer, tha se pas arsyetimit të presidentit rus, Vladimir Putin për luftën qëndron frika nga demokracia, në një vit të shënuar nga zgjedhje në mbarë botën.
Oficeri i lartë ushtarak u kërkon aleatëve dhe liderëve të planifikojnë për të papriturën në Ukrainë kur tha se lufta atje mund të “përcaktojë fatin e botës”, për pasojë ushtritë dhe liderët politikë perëndimorë duhet të ndryshojnë në mënyrë drastike mënyrën se si e ndihmojnë Kievin të shmangë forcat pushtuese ruse, raportojnë mediat e huaja.
Ndërsa lufta po vijon, Bauer bëri thirrje për një “qasje të të gjithë shoqërisë” ndaj sfidës që shkon përtej planifikimit ushtarak.
“Ne kemi nevojë për aktorë publikë dhe privatë që të ndryshojnë mentalitetin e tyre për një epokë në të cilën gjithçka ishte e planifikuar, e parashikueshme, e kontrollueshme dhe e fokusuar në efikasitet në një epokë në të cilën çdo gjë mund të ndodhë në çdo kohë.
Një epokë në të cilën duhet të presim të papriturën. Për të qenë plotësisht efektiv, edhe në të ardhmen, ne kemi nevojë për një transformim luftarak të NATO-s. Sot është dita e 693-të e asaj që Rusia mendonte se do të ishte një luftë tre-ditore. Ukraina do të ketë mbështetjen tonë për çdo ditë që do të vijë, sepse rezultati i kësaj lufte do të përcaktojë fatin e botës.
Kjo luftë nuk ka qenë kurrë për ndonjë kërcënim real të sigurisë për Rusinë që vjen nga Ukraina apo NATO. Kjo luftë ka të bëjë me frikën e Rusisë nga diçka shumë më e fuqishme se çdo armë fizike në tokë demokracia. Nëse njerëzit në Ukrainë mund të kenë të drejta demokratike, atëherë edhe njerëzit në Rusi së shpejti do t’i dëshirojnë ato”, tha ai.
