Raketat ruse kanë rënë mbi qytetin e Kharkivit si hakmarrje ndaj avancimit të Ukrainës në rajonin e Kurskut. Të paktën 7 persona janë konfirmuar të vdekur, ndërsa 97 të tjerë kanë mbetur të plagosur.
Lajmi është bërë i ditur nga kreu i administratës ushtarake rajonale, Oleh Syniehubov, i cili ka thënë se mes të plagosurve janë edhe 22 fëmijë.
Ai tha se sulmet e Rusisë kishin në shënjestër infrastrukturën civile, duke goditur një shkollë dhe disa banesa.
Në anën tjetër, edhe Ukraina nuk i ka ndalur sulmet e saj në territorin rus. Vetëm gjatë orëve të fundit, të paktën sipas zyrtarëve rusë, 5 persona janë vrarë në rajonin e Belgorodit.
Guvernatori Vyacheslav Gladkov akuzoi ushtrinë ukrainase për përdorimin e bombave thërrmuese, të cilat sipas tij, janë montuar në raketa dhe janë lëshuar nga “MLRS Vampire”.
