Plani i kryeministrit Edi Rama për të krijuar Shtetin e Urdhrit Bektashi, po merr reagime të shumta nga faktori i brendshëm politik, por edhe ai i jashtëm, përveç analizave të ndryshme në media.
Mes tyre është edhe zyra e BE-së në Tiranë, e cila dha deklaratën e saj ditën e sotme, rreth çështjes në fjalë.
“Nuk kemi komente në këtë fazë. Liria e mendimit, ndërgjegjes dhe fesë është e sanksionuar në nenin 10 të Kartës së BE-së, për të drejtat themelore. Në përgjithësi, BE-ja mbështet tolerancën dhe dialogun ndërfetar. BE-ja nuk ka kompetencë për të rregulluar çështjet fetare”, thuhet në reagimin e shkurtër të Bashkimit Evropian.
Ideja për krijimin e një ‘Vatikani’ për Bektashinjtë në zemër të Tiranës u bë publike pak ditë më parë nga një intervistë e kryeministrit Edi Rama bashkë me Baba Mondin për New York Times. Nëse merr aprovim nga parlamenti, ky minishtet do të ketë sipërfaqe te pakten 11 hektarë (pra vëtëm mbi prona që është toka e Kryegjyshatës Botërore Bektashiane) kufijtë e vetë, pasaportën e tij dhe shërbimin e vetë sekret.
Nga ana e tij Baba Mondi tha për median amerikane se shteti bektashi mund të ketë nevojë për një shërbim të vogël inteligjence, por nuk do të ketë ushtri, roje kufitare apo gjykata.
Kryeministri Rama pranoi se krijimi i një shteti sovran islamik në Tiranë do të kërkonte kohë.
“Ndoshta të gjithë do të thonë: “Ky djalë është i çmendur”, tha ai. Por, ai shtoi: “Këtë e kanë thënë shumë herë më parë, nuk më intereson. Gjëja e rëndësishme, e çmendur apo jo, është të luftosh për mirë”.
Bektashinjtë janë një rrymë brenda myslimanizmit, të quajtur sufi shiit i themeluar në shekullin e 13-të në Turqi, por tani me qendër në Shqipëri.
Bektashinjtë e zhvendosën selinë e tyre në Tiranë nga Turqia gati një shekull më parë pasi Mustafa Kemal Ataturkut, babait themelues i Republikës Turke, mbylli operacionet e tyre. Rreth 116 mijë shqiptarë u deklaruan bektashinj sipas censit të fundit.
Kryegjyshata Botërore Bektashiane është selia qendrore ndërkombëtare e Urdhrit Bektashi dhe ndodhet në lindje të Tiranës, pranë lagjes së njohur “Ali Demi”.
